Presidente Repúblika rejeita kandidatura hirak ne’e tanba ho razaun hakarak atu hatuur Estadu ne’e iha fatin ne’ebé dignu, iha kredibilidade nu'udar nasaun demokrátiku.

Ho razaun hirak ne’e politikamente Xefe Estadu rejeita kandidatura hirak ne’e no husu ba Primeiru Ministru atu substitui maibé governu kontinua ho lista hirak ne’e.

“Membru governu la kompletu ne’e la'ós kulpa Presidente Repúblika nian. Xefe Estadu somente fó pose maibé indijita ne’e Primeiru Ministru nian”, dehan nia, iha Uma Fukun PN, horisehik.

Iha fatin hanesan, deputadu Antonino Bianco reforsa, iha eleisaun antesipada partidu hotu-hotu hakarak hamoos KKN ne’e sai hanesan kompromisu eleitorál, tanba ne’e PR hakarak mós hatuur Estadu ida ne’e iha nia fatin.

Partidu tolu hanesan CNRT, PLP no KHUNTO iha rekursu umanu ne’ebé barak tebes, tanba saida mak PR husu atu substitui kandidatura hira ne’e PM mantein ho lista hanesan ema la iha ona atu kaer pasta hirak ne’e.

“CNRT, PLP no KHUNTO ema sei barak tanba saida mak ita tenke ezije tau nafatin ema hirak ne’ebé públiku hotu hatene ona nia aktu hirak ne’e”, dehan nia.

Nune’e, deputada Carmelita Moniz hatete, hanesan Estadu tenke halo separasaun podér, tanba ne’e atu julga ema ida ne’ebé deskonfia envolve iha kazu ruma ne’e so tribunál.

Iha konstituisaun ema hotu tenke komunga prinsípiu prezunsaun inosénsia ka naran di'ak ema ida nian, tanba ne’e labele julga ema seluk la tuir nia fatin.

“Ema iha familiariza, tanba ne’e kuandu sei deskonfia hela labele julga uluk ema ne’e sala ka loos, tanba orasida labele afeta liberdade família sira nian ba iha nia atividade”, tenik nia.

Alende ne’e, deputadu PLP, Francisco Vasconcelos, konsidera PR laiha kapasidade hodi analiza ‘Estadu Nasaun’ atuál, liuliu, laiha liu koñesimentu kona-ba sistema Estadu hodi hasai desizaun lakohi fó pose ba membru VIII Governu sira seluk.

Bainhira PR kontinua hasai medida ne’ebé inkonstitusionál hodi la aseita naran sira ne’ebé atu halo parte iha VIII Governu Konstitusionál ne’e provoka Estadu ne’e atu naksobu.