Vise-Prezidente Parlamentu Nasionál, Luis Roberto hatete, servisu órgaun soberania haat ne’ebé eziste ida-idak iha nia kompeténsia konstitusionál, maibé interdependénsia ba malu. Tanba ne’e, presiza servisu hamutuk hodi dezenvolve rai ne’e.

Oras ne’e daudaun, PN simu ona karta husi Prezidente Repúblika hodi husu autorizasaun vizita Estadu ba Portugál no nasaun balun, semana oin. Maibé, haree ba situasaun iha rai laran mós seidauk rezolve, liu-liu pose ba membru governu etapa daruak nian. Tanba ne’e, dezloka ba estranjeiru tenke hanoin no tetu didi'ak hodi rezolve uluk internu rai-laran nian.

“Ha’u haree situasaun mak la’o nune’e nafatin maka Prezidente Repúblika hakarak kontinua viajen ba estranjeiru, ha’u fiar katak parlamentu mós sei la aprova Xefe Estadu nia viajen”, dehan Luis, iha Uma Fukun PN, horisehik.

Luis hatutan, prosesu pose ba membru governu daruak nian Primeiru Ministru, Taur Matan Ruak, hasoru malu ona ho PR Lú-Olo hodi halo diálogu. Tanba ne’e, públiku hotu hakmatek hein rezultadu husi konversasaun entre sira.

Karik iha rezultadu pozitivu, entaun PN mós sei halo deliberasaun hodi aprova vizita Estadu ne’e, maibé laiha entaun órgaun PN mós sei suspende viajen ne’e.

Iha fatin hanesan, deputadu Bankada Partidu Demokrátiku (PD) Adriano do Nascimento hatete, ba membru governu sira ne’ebé seidauk simu pose ne’e Xefe Estadu no Xefe Governu nia problema, maibé hanesan deputadu iha PN sei hala’o nia funsaun tuir konstituisaun no rejimentu.

“Ba ha’u Parlamentu Nasionál sei tuir rejimentu katak iha loron 30 nia laran governu tenke mai aprezenta nia programa ida ne’e mak sai problema”, dehan nia.

Tuir Adriano, iha rejimentu PN ne’e dehan ona dentru loron 30 hahú husi loron 22 Juñu ne’ebé Xefe Estadu fó pose ba Primeiru Ministru, konta husi ne’e to’o 22 Jullu tenke iha programa, se laiha maka sei mosu fali governu foun.