Nune’e, Majór Jenerál Lere hatutan, VIII Governu propoin Vise-Xefe Estadu Maiór F-FDTL, Filomeno de Jesus Paixão ka’er pasta Ministru Defeza. Ne’e duni, iha pose daruak mai prioridade uluk ba nia hodi rezolve nesesidade militár.
“Ha'u hanoin katak ida ne’e laiha problema, quer dizér asuntu sira seluk ba militár la’o di'ak”, dehan nia, iha Palasiu Governu, horisehik.
Nia hatutan, maski Meno Paixão sai husi instituisaun hodi kaer pasta Ministru Defeza, maibé oras ne’e F-FDTL iha Brigadeiru na’in haat. Tanba ne’e, entre sira sei asume kargu nu’udar Vise-Xefe Estadu Maiór hodi substitui kandidatu ministru ne’e.
Lere Ezije Pose Ba MD
Entretantu Fitun Rua ne’e mós kontinua ezije ba ninia Komandante Supremu F-FDTL, Francisco Guterres ‘Lú-Olo’ tenke aselera pose uluk ba Meno Paixão asume kargu MD hodi rezolve nesesidade F-FDTL.
Nia dehan, ezijénsia militár ba Governu mak presiza rezolve nesesidade instituisaun F-FDTL nia moris di'ak, liu-liu bem-estar instituisaun ne’e tanba F-FDTL mak lutu nasaun nian.
Tanba ne’e, Lere hakarak antes Prezidente Repúblika hala’o vizita ba rai liur tenke fó pose uluk ba Ministériu Defeza.
Konkorda Ezonerasaun
Entretantu, reuniaun Konsellu Superiór Defeza Seguransa ne’ebé ko’alia kona-ba ezonerasaun Vise-Xefe Estadu Maiór Forsa Armada, Brigadeiru Jenerál Filomeno Paixão, atu asume kargu Ministru Defeza iha VIII Governu Konstitusionál.
Xefe Kaza Sivíl Gregório Sousa hateten, reuniaun Konsellu Superiór Defeza no Seguransa, membru hotu-hotu fó sira-nia votu unanimidade atu ezonera Brigadeiru Filomeno Paixão. Ne’e duni, iha tempu badak Prezidente Repúblika sei hasai Dekretu Prezidensiál relasiona ho desizaun ne’e.
Antes ne’e, VIII Governu Konstitusionál haruka ona proposta ba Prezidente Repúblika atu ezonera Vise-Xefe Estadu Maiór, Brigadeiru Jenerál Filomeno Paixão husi nia kargu atuál tanba hetan nomeisaun ba Ministru Defeza iha VIII Governu Konstitusionál.
Konsellu Superiór Defeza e Seguransa kompostu husi Prezidente-da-Repúblika Francisco Guterres Lú-Olo, Primeiru Ministru Taur Matan Ruak, Xefe Estadu Maiór Forsa Forsa Armada, Majór Jenerál Lere Anan Timur, Komandante Jerál PNTL Komisáriu Júlio Hornay, Ministru Negósiu Estranjeiru e Kooperasaun Dionísio Babo, Ministru Justisa Manuel Cárceres, Diretór serbisu Nasionál Intelijénsia Manuel Serano, David Dias Mandati (deputadu FRETILIN), Adérito Hugo da Costa (deputadu CNRT), Abel Pires (deputadu PLP) no Cristina da Silva.
