Povu mós fó onra boot ba esforsu no susesu husi xefe negosiadór prinsipál delimitasaun fronteira maritima Kay Rala Xanana Gusmão.
Ho Vitória ne’e halo povu TL hamriik metin liu tan hodi tau konfiansa hamutuk ho Kay Rala Xanana Gusmão luta nafatin atu dada kadoras mai Timor Leste.
Tuir Diretór Forum Organizasaun Naun Governamentál Timor-Leste (FONGTL), Arsénio Pereira hateten lia hirak ne’e iha salaun Asosiasaun HAK Faról - Dili, Kinta (08/03).
Nia dehan, Timor Leste nia direitu ba Fronteira Marítima lós ona, tanba ne’e povu hotu-hotu ezije ‘Pipe line’ tenke dada mai duni Timor-Leste.
‘’dezde uluk iha kompañia ida tun iha Timor, ami halo demonstrasaun hasoru iha aeroportu’’, nia haktuir.
Tanba ne’e, Arsénio fiar katak, povu Timor Leste sei la fó ulun atu dada pipe line ba Austrália.
“Greater Sunrise atu dada ba Austrália, ida ne’e ita sei la fó ulun ba governu Austrália ho nia povu. Ita fiar xefe negosiadór prinsipál delimitasaun Fronteira, Kay Rala Xanana Gusmão mós la fó ulun’’, Arsénio dehan tan.
Iha fatin hanesan reprezentante organizasaun AJAR, Inocêncio de Jesus Xavier hateten, ko’alia kona ba Greater Sunrise, ne’e kestaun tékniku ne’ebé presiza hetan esplikasaun husi membru governu.
Maibé, nu’udar sidadaun, iha parte sosiedade sivíl, iha mos obrigasaun no devér morál atu hatene saida mak atu akontese liga ba Greater Sunrise.
Maski nune'e sosiedade sivil apresia no orgullu ho vitória tasi timor nian, liuliu orgullu ho Kay Rala Xanana Gusmão ninia luta.
Iha fatin ketak, Antonieta Martins Joven Kolmera Dili espresa ninia sentimentu kontente tanba luta ne'ebé durante ne’e Kay Rala Xanana Gusmão halo ba Fronteira Maritima, iha ona rezultadu.
Nia mós fiar katak, ho rezultadu ne’e sei lori duni vantajen ba Timor Leste liuliu iha negosiasaun tuir mai liga ho kadoras.
Entretantu akordu ba delimitasaun Fronteira Maritima entre Timor Leste ho Austrália, asina iha loron 6 fulan Marsu tinan 2018, iha Novaiorke.
Timor Leste reprezenta husi adjuntu Primeiru Ministru ba asuntu delimitasaun fronteira sira Hermenegildo Pereira no asiste direta husi Sekretáriu Jerál Organizasaun Nasoins Unidas (ONU) António Guterres.
