MEK La Autoriza Eskola Fó Sansaun Selu Osan Featured

By Marsu 11, 2018 788
Ilustrasaun: Aman lori hela nia oan ba eskola Ilustrasaun: Aman lori hela nia oan ba eskola

DILI: Eskola sira iha Timor-Leste ida-idak mai ho ninia polítika rasik oinsá mak atu bele hanorin estudante sira sai dixiplina. Sansaun ne’ebé foti hahú husi morál no fíziku.

 

Eskola balun foti desizaun hodi fó sansaun morál, maibé mós balun fó sansaun fíziku hanesan hatama sasán ka osan bainhira kontra regra eskola nian.

Hanesan saida mak akontese iha Eskola Sekundária Jerál 4 Setembru, Eskola fó sansaun hatama osan US$ 2 bainhira falta eskola loron ida.

Maski nune’e, Ministériu Edukasaun no Kultura (MEK) kontra makaas ho polítika ne’e. Governu bandu eskola publika iha Timor laran tomak atu halo kobransa ba estudante sira ho osan iha prosesu aprendizajen bainhira laiha liña koordenasaun ho inan-aman sira ba atividade ne’e.

Ministériu Edukasaun e Kultura (MEK), Fernando Hanjam hateten, ba ensinu sekundária jerál públiku sira labele halo kontribuisaun ka fó sansaun ba estudante sira atu selu ho osan ne’e labele.

Ami sei haree iha kontribuisaun iha eskola sekundária jerál. Halo kontribuisaun ne’e tenke tuur hamutuk ho inan-aman sira”, dehan nia, iha salaun INFORDEPE, Balidi, horisehik.

Ne’e duni, ba eskola sira ne’ebé aplika sansaun selu osan, ministériu edukasaun sei haruka ekipa ida tun direita halo investigasaun, nune’e profesór sira labele foti desizaun ba estudante sira ho sansaun osan

Antes ne’e, diáriu ne’e publika ona katak, Eskola Sekundária Jerál 4 de Setembru aplika ona regulamentu foun ba estudante sira ne’ebé falta loron ida no abandona aula eskola dala tolu selu osan sentavu $0.50 to’o $2.

Objetivu estabelese regra ne’e atu halo hakfodak estudante sira bele sente hanesan naha todan ida ne’ebé tula hela ba sira nia leten, tanba dala barak estudante sira sempre falta no abandona aula (bolos).

“Ami halo regra ne’e atu halo estudante ta'uk atu labele falta no abandona aula, mais na realidade, fó tiha sansaun ba sira multa $2, maibé estudante sira baibain de’it no la ta’uk ida”, dehan Profesór ES Jerál 4 Setembru, Sérgio Alfredo da Cruz.

Nia dehan, loloos lei bandu atu eskola haruka estudante sira selu multa ba eskola, maibé estudante barak ne’ebé difisil atu kontrola ne’ebé rezulta estudante barak falta no husik hela aula (bolos) laiha koñesimentu tanba ne’e eskola hola inisiativa hodi aplika regra selu.

Osan sira ne’e, tau hamutuk too aniversáriu eskola nian sei aloka ba festeja ho estudante sira”, nia informa. 

Rate this item
(0 votes)
Last modified on Domingu, 11 Marsu 2018 16:12

Independente Digital TV