Komandu Operasaun Nasionál PNTL, Superintendente Xefe Henrique da Costa hateten, ministériu interiór simu ona diretiva husi Primeiru Ministru hodi hatún ba komandu PNTL atu antesipa insidente ne’ebé mosu bainhira iha prosesu kampaña ho eleisaun.
“Ami mós iha ona preparasaun pinsa maka halo atuasaun ba prosesu kampaña kandidatu Prezidente Repúblika nian ne’ebé sei tuir mai”, dehan nia, iha edifísiu ministériu interiór, Villa-Verde, horisehik.
Diretiva ne’e hasai relasiona ho konvoiu apoiante sira ne’ebé hamosu anarkizmu iha Dili foin lalais ne’e. Ne’e duni, la tolera ona apoiante sé de'it maka nakar iha fatin públiku sei halo atuasaun rigorozu.
Tanba ne’e Komandante rasik kontinua fó orientasaun ba membru sira hodi haforsa servisu operasaun iha fatin públiku, bainhira militante balun halai motór la tuir regra tenke halo atuasaun.
Komandante operasaun afirma, ba motorizada sira ne’ebé uza kanu racing, falta xapa matríkula no tula ema na'in tolu, bainhira Polisia kaer kona, asaun ne’ebé membru sira halo maka halo infrasaun no hatama iha sela hodi kumpre.
“Ba oin, ami sei hatún ami nia membru sira husi unidade hotu hodi apoiu malu”, dehan Henrique.
Iha fatin ketak, Prezidente Komisaun B Parlamentu Nasionál, David Dias Ximenes ‘Mandati’ hateten, prezensa polisia nian tenke preparadu kualkér tempu hodi prevene aktus krime sira ne’ebé akontese.
Nia konsidera, polisia falta operasaun antesipativa no preventiva atu labele hamosu aktu krime iha fatin públiku.
Mandati afirma, polisia tenke antesipa fenómenu ba konflitu hodi halo prevensaun ba iha fatin públiku sira atu lakuna sira keta akontese iha tempu kampaña laran.
Tanba ne’e, deputadu ne’e husu ba komandante operasaun tenke kria tékniku operasionál ne’ebé di'ak hodi dezloka membru sira iha terrenu hodi asegura kampaña ba kandidatura sira ne’e.
Antes ne’e, apoiante kandidatura Prezidente Repúblika, Francisco Guterres ‘Lu-Olo’ no apoiante António da Conceição ‘Kalohan’ ataka malu iha Rai-Kotuk, Aldeia Terra Santa, iha loron primeiru kampaña eleisaun Prezidensiál, Sesta (3/3).
