Xefe Estadu Maiór Jenerál FALINTIL-Forsa Defeza Timor Leste (F-FDTL), Majór Lere Anan Timur konsidera konflitu sira ne’ebé foin lalais ne’e akontese lider polítiku sira laiha kapasidade hodi rezolve kazu ne’e.
“Agora sei faze kontinuasaun kampaña, karik akontese hela de'it konflitu hanesan ne’e maka bele dehan lider polítiku inkapasidade. Tantu lideransa jerasaun foun ho tuan,” dehan nia, iha Kuartél Jenerál F-FDTL Fatuhada-Dili, Segunda (6/3).
Nia dehan, lider polítiku sira laiha kapasidade hodi kontrola asaun ne’ebé apoiante sira halo konfrontasaun bainhira iha prosesu kampaña.
Lere konsidera, tinan ne’e dezafiu boot ba F-FDTL hodi koko forsa armada nia kapasidade, tanba ukun na'in sira hadau kadeira hodi ukun, tanba ne’e militár sira keta monu ba lasu.
Tuir nia, meius sira ne’e maka tenke tau atensaun ba aspetu ne’ebé merese duni implementa, atu kampaña tuir mai labele mosu konflitu hodi harahun komunidade nia uma.
Antes ne’e, Apoiante kandidatura Prezidente Repúblika, Francisco Guterres ‘Lu-Olo’ no apoiante António da Conceição ‘Kalohan’ ataka malu iha Rai-Kotuk, Aldeia Terra Santa, iha loron primeiru kampaña eleisaun Prezidensiál, Sesta (3/3).
Insidente ne’e rezulta uma 36 hetan estragu no ema na’in rua kanek. Joven na’in rua ne’ebé kanek identifikadu ho naran Virgílio de Araújo (18) kanek iha rentós no Roberto Carlos das Neves (14) kanek iha parte ain-tur.
Xefe Aldeia Terra Santa, Esperança de Jesus hateten, apoiante sira husi kandidatura Lu-Olo ne’ebé uza atributu partidu nian halo agresaun fízika no anarkizmu ba komunidade sira hodi estraga uma ho sasán.
“Ami triste tebes ho asaun ne’ebé militante sira halo mai ami,” dehan nia, liu husi konferénsia imprensa, iha Aldeia Terra Santa, Sábadu (4/3).
Nia husu, Kandidatu Lu-Olo tenke responsabiliza ba aktu ne’ebé militante sira halo ba komunidade sira hodi rezulta sobu no estragu komunidade sira nia uma ho patrimóniu seluk.
Xefe Aldeia ne’e afirma, kauza ba akontesimentu ne’e tanba mobilizasaun masa husi Dili ba Gleno hodi hamosu konfrontasaun ba komunidade no vítima na’in rua maka hetan kanek ho agresaun ne’e.
Nia dehan, seguransa PNTL sira tenke hala’o asaun preventiva ba movimentu kampaña sira atu labele akontese konflitu.
Tanba ne’e, nia apela ba komunidade ho joven sira iha Aldeia Terra Santa atu labele tuur iha lurón ibun hodi provoka situasaun, no estrada ne’e públiku ne’ebé ema hotu iha diretu atu halo movimentu ba-mai.
