Peska ilegál agora invade makaas área tasi timor nian, maibé difisil atu kombate tanba Komponente Navál no Unidade Polisia Marítima iha difikuldade kona-ba ekipamentu servisu, liuliu ró operasaun.

Rezultadu estudu balun ne'ebé parte Governu fó sai katak, tinan ida nia laran Timor-Leste lakon nia rikusoin iha tasi-laran kompara ho osan karik ho montante tokon $300 mak lakon kada tinan.

Ho preokupasaun sira ne’e, Xefe Estadu Maiór Jenerál FFDTL, Lere Anan Timur kestiona ró forsa navál nian ne'ebé governu Timor-Leste sosa husi Xina hodi utiliza hodi halo patrulamentu ba iha tasi Timor hodi kontrola peska ilegál sira, maibé ikus mai la aproveita di'ak tanba kondisaun ró la di'ak.

Haree ba situasaun ne’e, Prezidente Komisaun B PN, David Dias Ximenes ‘Mandati’ hateten, Governu tau osan atu sosa ró ne’e ho intensaun atu halo operasaun iha tasi Timor tomak, maibé ikus mai ró ne’e labele ba tasi mane. Entaun, peskadór ilegál ne’e sempre mai na’ok iha área ne’ebá.

Tanba ne’e, rekomenda ba instituisaun relevante atu bele buka hatene ró ne’e sé mak sosa hodi husu responsabiliza imediata atu bele responde situasaun ne'ebé forsa navál enfrenta.

“Kompañia tenke responsabiliza agora kedas, tanba sosa ró mai atu bele halo operasaun la'ós mai halimar fali tasi feto de'it, tenke ba tasi mane hotu”, dehan nia, iha Uma Fukun PN, horisehik.

Nia mós rekoñese riku-soin barak lakon iha tasi mane polisia labele halo buat ruma, tanba laiha ekipamentu adekuadu atu bele utiliza hodi prevene.

Tuir nia, governu sosa ró bazeia ba Bill of Quantity (BoQ) no estudu ne'ebé kompañia halo katak, ró ho kapasidade hanesan ne’e bele responde nesesidade ka lae. Maibé, kuandu kompañia halo mak la tuir espesifikasaun tuir nesesidade atu uza ne’e tenke responsabiliza.

Parlamentu Nasionál hanoin tau osan hodi sosa fali ró foun ho kapasidade liu agora ne’e, maibé kompañia tenke responsabiliza lai situasaun agora ne’e.