“Kona mós ba liña datoluk orientasaun orsamentál nian, Governu ne’e sei apoia partisipasaun  Timor Leste  nian iha Expo Dubai, ne’ebé Governu konsidera hanesan biban ne’ebé relevante tebes ba projesaun internasionál husi ita-nia país no ba kaptasaun investimentu estranjeiru ba ita-nia ekonomia,” deklara PM Taur bainhira aprezenta proposta OJE 2020 ba PN, Segunda (02/12). 

Governu Aliansa Mudansa ba Progresu (AMP) iha proposta Orsamentu Jeral Estadu (OJE) 2020 propoin osan hamutuk tokon $2 hodi ba partisipa iha expozisaun (expo) Dubai.

Expo Dubai rasik sei realiza iha tinan 2020 no ekipa Timor Leste sei lidera husi eis Ministru Turizmu, no atual Sekretariu Jeral partidu CNRT Francisco Kalbuadi Lay.

Tenke Kria Uluk Kondisaun

Entretantu, Bankada FRETILIN iha PN fó kritika ba programa governu AMP atu partisipa iha Expo Dubai.

Deputadu Bankada FRETILIN, Joaquim dos Santos konsidera promove TL iha rai li’ur ne’e importante maibé molok halo promosaun, presiza kria uluk kondisaun.

“Promove ita-nia nasaun ba rai li’ur ne’e ema hotu aseita maibé haree lai kondisaun, osan ne’e atu halo ba saida?, nusa ita (la) konsentra iha rai laran?,” dehan nia.

Tuir deputadu ne’e, fatin turizmu barak mak governu seidauk tau prioridade.

“Ita ba kanta-kanta iha rai li’ur maibé iha rai laran seidauk iha buat ruma, see mak atu mai Timor Leste?,” nia kestiona.

Tuir nia, di’ak liu osan ba Expo Dubai uza hodi prepara kondisaun iha rai laran duke ba gasta iha rai li’ur ne’ebé sei la fó benefisiu ba TL.

“Ita ba iha ne’eba promosi mamuk, tanba ita-nia kondisaun sira seidauk prepara. Ita ukun aan tinan barak ona, maibé governu liu-liu Ministeriu Turizmu nia serbisu mak saida?, nia halo ona saida iha Timor?. Ita gasta osan barak ona maibé produs ona saida?,” deputadu ne’e husu.