PD Lakohi Rai Ne’e Monu Fali ba Eleisaun Antesipada Featured

By Maiu 12, 2018 1077
Assanami foti liman fuan hafoin vota iha sentru votasaun, SD Bairo Pitte, Dili Assanami foti liman fuan hafoin vota iha sentru votasaun, SD Bairo Pitte, Dili

DILI: Presidente Partidu Demokratiku, Mariano Assanami Sabino hatete, konfiansa povu ba partidu sira husi rejultadu ba loron ohin nian tenki lori rai ne’e ba oin no labele monu tan ba eleisaun antesipada.

“Uluk kedas PD deside dehan halo koaligasaun boot ho povu, entaun respeita povu nia desizaun no saida mak povu deside ohin ne’e sira nia direitu, ita hein no simu desizaun,”dehan Assanami Sabino ba jornalista hafoin ezerse nia direitu votu iha sentru votasaun, SD Bairo Pitte, Dili.

Nia husu ba povu atu hadeer no hamrik hodi ezerse direitu votu, tanba rai ida ne’e desizaun inan-aman nian. Labele husik ema ida atu senti la vota, tanba durante tinan lima povu nia votus mak sei transforma ba desizaun.

Nuudar partidu labele deside atu manan ou lakon maibé hotu-hotu povu mak deside no lider sira tenki hakmatek.

Tanba ne’e PD husu ba lider sira seluk atu respeita povu nia desizaun ba loron ohin nian, tanba loron ida ohin direitu povu nian.

Tuir observasaun diario ne’e, situasaun iha sentru votasaun hotu-hotu iha kapital Dili hakmatek. Polisia Nasionál Timor-Leste kontinua hala’o seguransa iha sentru votasaun hotu-hotu.

Aliende ne’e, povu mós antusiaismu tebes hodi ezerse sira nia direitu votu. 

Rate this item
(0 votes)

Independente Digital TV