Reprezentante Partidu FRETILIN, Francisco Miranda Branco hateten, paktu unidade nasionál iha ona akordu, maibé labele sai aktu formál. Tenke iha pratika vida partidu sira iha publika.
Nia dehan, lider partidu sira tenke tetu deklarasaun sira molok aprezenta komísiu iha públiku, nune’e serteza ho paktu unidade nasionál ne’ebé asina ona atu labele insulta malu ikus mai povu ho nasaun mak vítima.
“Tenke sér iha vida pratika partidu polítika sira bainhira intervein iha públiku,” dehan Francisco, iha Sede CNE Kolmera, Sábadu (7/4).
Tuir nia, ba partidu FRETILIN hakarak unidade nasionál. Ne’e duni, partidu sira tenke se liman ba malu hodi bele kria estabilidade nasionál atu promove demokrasia iha Timor laran.
Branco dehan, ideolojia mak diferente la signifika lider sira atu se kotuk ba malu, maibé prosesu demokrasia mak nune’e. Klaru objetivu mak atu kria unidade nasionál atu lori povu ba naroman.
Tanba ne’e, partidu FRETILIN kontinua eduka militante sira nune’e prosesu kampaña to’o apuramentu nasionál tenke la’o hakmatek, tanba paktu ne’e rasik iha ona konkordánsia.
Entretantu, reprezentante koligasaun Aliansa Mudansa ba Progresu (AMP), Fidelis Magalhães dehan, paktu unidade nasionál hala’o ona kompromisu, iha ne’ebé AMP rasik hakarak kontribui ba pás no estabilidade nasionál.
Nia dehan, kuadru polítika AMP nian kontinua hakbesik hodi eduka militante tomak hodi promove pás no estabilidade, tanba paktu unidade nasionál ne’e rasik AMP hakarak koopera malu promove estabilidade no haburas demokrasia.
Fidelis dehan, lideransa AMP nunka hanoin atu orienta militante sira atu hala’o frau de eleitorál tempu kampaña, maibé AMP rasik husu ba partidu ho koligasaun seluk tenke eduka militante sira hodi promove demokrasia iha Timor-Leste.
Sekretáriu Jerál Partidu Demokrátiku (PD), António da Conceição hateten, kompromisu ne’ebé hala’o ne’e la’ós ba grupu ida, maibé interese estadu. Tanba ne’e, merese duni iha paktu unidade nasionál hodi regula partidu polítiku sira atu prosesu kampaña bele la’o hakmatek.
Tuir nia, PD hakru'uk ba kompromisu ne’ebé hala’o ona, nune’e kontinua apela ba militante no simpatizante sira iha prosesu kampaña tomak tenke hakru'uk ba Kompromisu ne’e tanba objetivu mak tenke iha unidade.
António hatutan, PD garante katak laiha militante PD atu destrui prosesu kampaña to’o apuramentu nasionál. Hakarak hotu-hotu sé liman ba malu nune’e haforsa liután prosesu demokrasia iha Timor-Leste ne’ebé buras liután.
Nune’e Prezidente CNE, Alcino de Araújo Barris hateten, partidu ualu (8) ne’ebé atu konkorre iha eleisaun antesipada ho kompromisu livre no pás, nune’e nasaun ne’e hakmatek liután.
Antes hala’o asina paktu unidade nasionál, CNE konvida lia-na’in munisípiu 13 hodi hamulak no promete ba rai lulik no matebian sira, durante iha kampaña mak partidu polítiku ualu komete lakuna lulik ho matebian sira mak tau matan ba partidu polítiku durante kampaña.
“Partidu polítiku no koligasaun sira asina ona paktu unidade nasionál karik simpatizante ruma mak hala’o perturbasaun fasil ba sira atu prosesa tanba sira (partidu) rasik mak apoia,” dehan Alcino.
Nia dehan, tanba iha ona kompromisu ne’ebé lia-na’in, reprezentante partidu polítiku, autoridade seguransa nasionál, observadór polítika no mós konviksaun relijioza tomak. Bainhira iha frau eleitorál maka akontese, PNTL prontu atua.
Maibé, haree ba pasadu faktu barak mak akontese iha frau de eleitorál bainhira mosu tempu kampaña to’o kontajen votu sempre mosu konfrontasaun.
Ne’e duni, Prezidente CNE dehan, tanba iha ona kompromisu nune’e partidu polítiku sira hala’o ona akordu atu koopera estabilidade nasionál ho hakmatek, ne’e duni CNE koordena ho PNTL prosesa nune’e delega ba Ministériu publika.
