Diretór Klínika Bairru-Pité, Daniel Murphy hateten, klínika ne’e taka ona. Atividade sira ne’ebé baibain hala'o iha klínika ne’e sei hapara hotu tanba sei buka solusaun ba rezolve problema finanseiru nian.

Nia esplika, doutór sira mós hahú la tama servisu tanba laiha finansiamentu. Tanba ne’e, konsekuénsia boot ba Timór ema terus no bele mate, tanba ema moras barak.

“Ami triste maibé ami husu ba Governu maibé la fó ajuda sufisiente atu selu ema nia vensimentu, entaun enfermeira sira hamlaha tanba fulan rua ha’u la selu sira”, dehan doutór Daniel Murphy, iha nia knaar fatin Bairru-Pité, horisehik.

Nia dehan, klínika ne’e taka ho razaun katak laiha finanseiru atu selu ba doutór sira, tanba ne’e fulan ida presiza osan rihun $30 atu selu ba servidór klínika ne’e.

Maski nune’e, dadeer-dadeer doutór Daniel kontinua bele fó konsulta ba pasiente sira, maibé labele fó sira baixa no partu. Tanba ne’e, pasiente sira mai loron-loron balun presiza duni atu baixa, maibé labele tanba enfermeiru sira laiha.

“Ha’u laiha fatin atu fó (pasiente) sira baixa tanba laiha enfermeira”, dehan nia.

Daniel hatutan, pasiente balun haruka ba klínika seluk, maibé sira lakohi ba klínika seluk, hakarak maka klínika ne’e.

“Ha’u haruka ona proposta ba governu presiza orsamentu ba klínika Bairru-Pité atu klínika ne’e bele la’o nafatin atu ajuda ba povu kbiit laek ona sira”, tenik nia.

Klínika ne’e taka ona, maibé loron-loron bele konsulta ba pasiente sira maibé baixa tenke haruka ba ospitál boot no mós klínika sira seluk hanesan Vera Cruz no Komoro.

Pasiente Sente Ameasadu

Pasiente sira ne’ebé moras hala’o sira nia moras halo tratamentu iha klínika Bairru-Pité ne’e husu ba governu atu labele taka klínika ne’e, tanba salva ona ema barak nia vida.

Adelina Ximenes (40), pasiente husi Munisípiu Ermera husu ba governu labele taka klínika ne’e, tanba kuandu klínika ne’e taka vida pasiente barak mak sei ameasadu, tanba durante ne’e klínika Bairru-Pité sala ona vida barak.

Tanba ne’e, maka nu’udar pasiente la konkorda katak klínika ne’e taka, maibé husu ba governu atu kontinua apoiu klínika ne’e hodi kontinua fó tratamentu ba povu kbiit laek sira.

“Ami nia hakarak maka klínika ida ne’e labele taka”, dehan pasiente Adelina, bainhira konsulta iha Klínika Bairru-Pité, horisehik.

Tanba ne’e, nu’udar pasiente ida la konkorda bainhira klínika ne’e taka tanba kura ema nia moras hanesan TBC, epatite, diarreia, no moras sira seluk mai iha ne’e doutór Daniel sempre fó tratamentu ne’ebé di’ak no mós sempre hetan kura.

Nune’e, pasiente Cristina Ximenes husi (30) husi Baukau, hateten pasiente sira la hataan klínika ne’e taka, doutór Daniel fó ai-moruk ne’ebé sira sempre hetan kura.

“Ha’u kontente tebes konsulta iha klínika ne’e tanba ha’u mai konsulta doutór Daniel fó ai-moruk ha’u di’ak kedas. Tanba ne’e, maka klínika ida ne’e taka ha’u la hataan ida”, tenik nia.

Pasiente sira sente konsulta iha klínika ne’e di'ak liu kompara ho ospitál boot ka klínika Estadu nian sira seluk, tanba bainhira hetan ai-moruk ruma husi klínika ne’e sira nia moras bele pasa, maibé iha fatin seluk difisil tebes atu kura moras ida.