Vise Kordenadór Komisaun Judisiariu AMP, Tiago Sarmento klarifika, atividade rituál iha Ainaro loron 9 fulan-Abril foin lalais ne’e seidauk iha tempu kampaña.

Nia esplika, kampaña hahú iha loron 10 fulan-Abril, entretantu atividade ritual hala’o ona iha loron 9 fulan-Abril antes.

Tanba AMP mós konsienta katak rezolusaun governu nian iha lei núneru 5/2017 ne’e validu hela taka arte-marsiais, bandu atu la hetan atividade treinu husi arte-marsiais ho arte-ritual nomos ulitiza armas brankas.

Tiago dehan, hala’o serémonia arte-rituál ne’e normal bainhira la hamosu krime ruma ou fó ameasa ba ema ida.

“Bainhira halo asaun ba ema ida ne’e ita konsidera hanesan krime maibé seremonia hanesan ne’e la krime,”dehan nia. 

Iha media sosiais, públiku kestiona kona ba atributu (hena) KORK ne’ebé fó hatais ba Presidente AMP Xanana Gusmão ho nia porta-voz Taur Matan Ruak iha sermonia arte-rituál ne’e.

Iha sorin seluk, Provedór Direitus Humanus no Justisa (PDHJ) mós haree kestaun ne’e husi prespetiva lei.

Adjunta PDHJ Horacio de Almeida sei duvida ba informasaun husi media sosial katak semonia arte-rituál ne’e hala’o antes loron kampaña ou hafoin kampaña.

Tuir nia katak, karik sermonia arte-rituál hala’o iha loron kampaña ne’e viola ona rezolusaun governu nian.

”Ami hanesan instituisaun ne’ebé independente estadu ninia ami so haree ba buat ne’ebé ami haree ho matan ka  iha jornal ka ita nia media nasionál sira fó sai, mas fecebok ami uza maibé ami laiha referensia kona ba ida ne’e,”dehan Adjunto ba jornalista sira foin lalais.

Tuir nia katak, karik iha kampaña mak Xanana Gusmão ho Taur Matan Ruak uza atributu arte-marsiais ne’e mak viola lei eleisaun parlamentar no rezolusaun governu nian.

Maibé ne’e kompeténsia CNE ho Polisia mak bele foti medidas imediata kuandu uza atributu rituál iha kampaña nia laran.

Tanba moris iha estadu demokratiku ema hotu-hotu iha lei nia okos, ema hotu-hotu iha direitu atu tuir arte-marsiaias maibé tenke respeitu ba lei ne’ebé regula ona iha nasaun nia laran.