Adjuntu Diretór Asosiasaun HAK, Sisto dos Santos hatete, iha kampaña eleitorál ne’e funsionáriu públiku sira ne’ebé asume kargu polítiku dala ruma uza fali sasán Estadu nian hodi ba halo atividade partidu nian, liu-liu hanesan karreta no motór.

“Ha'u husu ba funsionáriu, governate, deputadu no eis-deputadu sira ne’ebé sei uza hela karreta ka motór Estadu nian karik atu entrega ona hafoin ba kampaña eleitorál”, dehan nia, iha knaar fatin, Faról-Dili, Sesta (6/4).

Hanesan sidadaun tenke respeitu sasán públiku labele uza fali patrimóniu Estadu nian ba atividade privadu ne’e konsidera abuzu podér. Tanba ne’e, husu ba KAK no PDHJ atu halo monitorizasaun ba prosesu ne’e tomak.

Antes ne’e, husu ba eis-deputadu III lejizlatura atu mai hatama ona karreta prado ne'ebé oras ne’e privatiza ona tanba karreta hirak ne’e sei pertense ba patrimóniu Estadu.

Maibé, to’o agora seidauk entrega ba konsellu administrasaun parlamentár. Tanba ne’e, kuandu sira uza ba kampaña eleitorál husu ba KAK no PDHJ atu haree kuandu sira kontinua uza tenke kriminaliza sira hodi entrega ba polisia atu halo atuasaun, tanba durante ne’e fó ona karta xamada dala tolu ba sira atu entrega karreta ne’e.

Iha fatin ketak, Prezidente bankada FRETILIN, Francisco Miranda Branco hatete, kazu uza patrimóniu Estadu ba halo atividade kampaña eleitorál ne’e iha tinan kotuk akontese no konsege rejistu duni iha Tribunál.

Tuir lei labele utiliza sasán públiku ba halo atividade partidu nian. Tanba ne’e, antes atu ba kampaña eleitorál karreta Estadu ne’ebé funsionáriu sira uza tenke entrega hotu.

Ba karreta ne’ebé membru parlamentu nasionál uza daudaun ne’e ba de’it atividade konsolidasaun partidu nian no kontaktu eleitorál, nune’e ba kampaña sei uza fali karreta privadu.