Governu propoin extensaun Estadu Emerjénsia, relasiona situasaun Timor-Leste ba surtu Corona virus (COVID-19) ne’ebé ho númeru kazu positivu aumenta bebeik.
Tuir dadus SIJK, tersa horsehik konfirmadu suspeitu na’in 361. Husi númeru ne’e, negativu na’in 252, positivu na’in 23, na’in ida rekupreadu, provavél na’in haat (4), no hein rejultadu husi laboratóriu na’in 80.
Tuir komunikadu ne'ebé fó sai husi Prezidénsia Repúblika iha loron, Tersa 21 Abril 2020 katak, Estadu emerjénsia ne’ebé Prezidente Repúblika dekreta iha 27 marsu sei remata iha 26 abril 2020.
Governu propoin estensaun estadu emerjénsia ba fulan ida tan, hahú husi 27 abril-26 maiu 2020.
Governu hatama proposta estensaun estadu emerjénsia atu fó protesaun ba saúde públika iha Repúblika Demokrátika Timor-Leste. Tanba coronavirus nu’udar pandemia nune’e presiza medida preventiva lalais atu la hadaet moras at ne’e babeibeik no hamate ema barak.
Hafoin rona hanoin sira husi Konsellu Estadu no Konsellu Superior Defeza no Seguransa, Prezidente Repúblika sei foti desizasaun. Molok dekreta estadu emerjénsia, Prezidente Repúblika sei husu autorizasaun husi Parlamentu Nasionál. Bainhira Parlamentu Nasionál autoriza, Prezidente Repúblika sei dekreta estadu emerjénsia.
Prezidente Repúblika iha 27 fulan-Marsu deklara estadu emerjénsia ho fundamentu hadook ema hotu-hotu ne’ebé hela iha Timor-Leste husi kalamidade públika ne’ebé mosu husi COVID-19. Deklarasaun estadu emerjénsia abranje territóriu nasionál tomak.
