Prezidente Repúbliku ho aseitasaun husi Parlamentu Nasionál dekreta ona estadu emerjensia (EE) ba teritoriu nasionál hahú husi 28 Marsu to'o 26 Abril tinan ne'e. Iha posibilidade boot atu extende ba loron 30 tan bainhira kazu pozitivu Covid-19 kontinua aumenta.
Hafoin PR dekreta EE, ema lubuk ida ne'ebé durante ne'e buka moris no hala'o estudu iha kapital Dili fila ba ida-idak nia munisipiu. Movimentu ema nian mós hahú menus ba beibeik. Realidade ne'e fó influensia ba rendimentu negosiante sira, liu-liu negosiante kiik sira, ne'ebé durante ne'e buka moris iha dalan ibun.
Negosiante Ambulante ida, Zelia Emilia Guterres (46) ne'ebé durante ne'e faan sasan iha area Largo Lecidere sente tebes efeitu negativu husi implementasaun EE.
Zelia hatete, hafoin implementasaun EE rendimentu husi negosiu ne'ebé nia halo tuun drastiku.
Tuir nia, molok implementasuan EE, loron ida nia bele hetan rendimentu $20 to'o $30, maibé bainhira implementa EE nia hetan de'it $2 to'o $4.
"Rendimentu husi faan sasan ne'e balun ami rai atu sosa fali sasan hodi faan no balun fali ami rai atu sosa nesesidade uma laran nian. Mais agora rendimentu tuun loos hanesan ne'e ami la hatene atu halo oinsa," dehan nia iha nia fatin negosiu, Lecidere, Tersa (21/04).
Maske preokupa mós Covid-19, maibé Zelia dehan, nia tauk mós atu mate hamlaha.
Iha fatin ketak, José da Silva de Jesus (47) ne’ebé durante ne'e leba modo haleu kapital Dili preokupa mós tanba nia tenke la'o ain husi Remixio mai Dili hodi bele faan modo.
“Ha'u la'o ain de'it husi Remexio mai Dili atu faan modo. Dala-ruma to'o iha dalan modo namlaek hotu, pasiensia tenke faan baratu, lae hasoru ema balu fó de'it,” dehan nia.
Entretantu, deputadu husi Bankada FRETILIN iha Parlamentu Nasionál (PN) Alexandrino Cardoso da Cruz dehan, nia simu informasaun katak komunidade balun hahú hamlaha ona.
Deputadu ne'e hatete, komunidade balun laiha ona serbisu tan ne'e sira laiha ona osan atu sosa hahaan.
"Sira sosa ho kada kilo de'it ne’e mós dezaraska," dehan nia.
Nia hatete, falta loron haat de'it EE atu remata ona no karik governu hakarak atu extende tenke foti medidas hodi rezolve problema ne'ebé povu hasoru, liu-liu oinsa atu atende sira-nia nesesidade baziku.
Deputadu ne'e sujere atu ministériu relevante serbisu hamutuk ho Sentru Lojistika Nasionál hodi distribui ona foos ba familia kbiit laek sira.
"Prioridade liu ba familia ne’ebé mak laiha servisu, maibé fusionariu sira ne’ebé mak manan osan fulan-fulan para lai, labele hetan subsidiu, importante mak povu kbiit laek sira ne’e," dehan nia.
