Portavoz SIJK, Sergio Lobo hatete, horisehik (20/4), rejultadu teste labratóriu hatudu katak sidadaun Portugeza na’in ida maka konfirmadu, maibé  ohin aumenta tán na’in ida.

“Ha’u hetan ona informasaun husi ekipa epidemolojika iha Likisá konfirma ona katak sidadaun sira iha ne’eba ema seiduak hamosu sintomas ruma relasiona ho COVID-19,”dehan nia, liu husi konferensia imprensa, iha CCD, ohin.

Molok ne’e, Portavoz SIJK, Rui Maria de Araujo hatete, grupu Portugués sira iha Likisá husi grupu ne’e, ema na’in rua maka iha Timor-Leste, sira ne’e hanaran sub-grupu TL, no na’in ida ne’ebé pozitivu iha Portugal ne’e hanaran sub-grupu P, sira halo viajen mai Timor-Leste iha periode ne’ebé la hanesan.

Sub-grupu TL ne’ebé oras ne’e iha ne’e, sira to’o Timor iha loron 28 fulan-Fevereiru 2020, sub-grupu iha Portugal to’o iha Timor iha loron 8 fulan-Marsu.

“Sub-grupu TL to’o oras ne’e la hetan sintomas ruma, maibé tanba sira tama iha kriteriu kontaktu besik ho sub-grupu P, ataun sira submete ba ezame laboratorial no rejiltadu ikus konfirmasaun husi Hospital Royal Darwin hatudu na’in ida pozitivu ho karga viral ne’ebé kikoan, no ida indeterminadu,”dehan nia.

Rui hatete, sub-grupu P ida ne’ebé oras ne’e iha Portugal hatudu nia sintomas durante iha nia viajen fila ba Portugal iha loron 4 fulan-Abril hafoin halo izame laboratoriu iha loron 6 fulan-Abril, no hetan rezultadu pozitivu iha ne’eba.

Professor sira ne’ebé hela ho grupu P, rezultadu laboratoriu hatudu negativu no motorista ida ne’ebé durante ne’e tula sira ba mai mós hatudu rezultadu negativu hotu.

Hahú husi Estadu Emerjensia mai to’o agora professor sira iha Likisá ne’e ida-idak hela iha nia uma, signifika sira kontinua tuir regras OMS nian, halo distansiamentu sosial, no ida-idak mantein ijiene.