Iha mundu tomak, kuadra festiva Natal no fim-do-ano ajuda haforsa relasaun entre família no entre belun sira. Iha rai barak, família no belun sira fó ba malu prezente oin-oin nu’udar símbolu hosi sira-nia domin ba malu. Iha Timor-Leste maluk timoroan barak la iha prezente atu fó ba malu. Barak mak kbiit-laek. Maibé ita hotu-hotu iha rikusoin boot ida atu fó ba malu: ita-nia domin.

Ho domin no respeitu ba malu mak ita hametin páz. Ho páz no estabilidade mak ita bele haburas babeibeik ita-nia rai doben Timor-Leste.

Molok hakat ba tinan foun, ita ida-idak tenke halo refleksaun ba ita-nia hahalok rasik durante tinan 2017. Ita tenke haree ba susesu ne’ebé ita halo ona. Ita tenke hanoin-hetan mós sala sira. Nu’udar sala ema idak-idak nian no nu’udar sala koletivu. Ita rekoñese sala atu ita aprende oinsá ita nakfilak ita-nia sala ba susesu, iha tinan oin mai ne’e.

Demokrasia fó dalan ba ita hato’o hanoin oin-oin no oin-seluk. Maibé hanoin ne’ebé halibur ita tenke forte liu duke hanoin sira ne’ebé haketak ita. Hamutuk, ho prinsípus no valores, ita sei forte liu, ita sei matenek liu, ita bele buka dalan di’ak liu atu halakon kiak iha ita-nia rai doben, ho hotu-hotu ninia partisipasaun.

Ho espíritu unidade no serve povu mak ha’u fó Boas-Festas Natal ba povu tomak.

Ha’u apela ba maluk sira hotu, liuliu ba polítiku-na’in sira ne’ebé promete no simu kbi’it hosi povu, atu sukat no tetu didi’ak imi-nia lia-fuan no hahalok, atu fó liman ba malu hodi serví ita-nia povu.

Hamutuk ita sei haburas Timor-Leste no halakon kiak

atu povu tomak moris di’ak liután.

DAME HELA HO ITA HOTU!