Sekretáriu Jerál Konsellu Administrasaun PN, Mateus Ximenes Belo hatete, konsellu tenta halo beibeik aprosimasaun ho eis-deputadu sira liu husi karta xamada atu mai entrega karreta, maibé to’o agora sira la koopera.
Karta xamada atensaun ba eis-deputadu sira ba dala tolu ona no fó limitasaun tempu atu entrega to’o Janeiru 2018.
“Iha Janeiru sira tenke entrega, lae submete mai iha Konsellu Administrasaun atu hola desizaun atu ba hola direita”, dehan nia, iha Uma Fukun PN, horisehik.
Nia hatutan, karreta sira ne'ebé eis-deputadu sira uza iha lejizlatura liu ba ne’e agora hatama ona 40 no hela 20 resin mak seidauk entrega.
Antes ne’e, mós portavós PN, Lídia Belo hatete, karreta Prado sira ne'ebé para ona iha resintu PN ne’e komesa atribui ona ba deputadu bankada parlamentár sira.
Husi totál karreta ne'ebé entrega ona ne’e bankada partidu KHUNTO simu ona rua no husi Partidu Libertasaun Populár (PLP) haat hodi bele ajuda sira hala’o servisu loron-loron nian.
