Antes ne’e, Majór Jenerál F-FDTL, Lere Anan Timur, mós deskonfia kilat ilegál balun tama husi fronteira Atambua mai Timor-Leste.

Tanba ne’e, husu ba sidadaun sira ne'ebé rai hela kilat karik bele entrega direita ba polisia ka forsa sira. Karik ta'uk atu entrega bele soe ba tasi laran.

Ministru Somotxo reforsa tan hodi hatete, deskonfia kilat ilegál ne'ebé sei espalla iha rai laran ne’e sai hanesan preokupasaun boot ida ba parte defeza no seguransa nian.

Nasaun ida ne’e lakohi atu sidadaun sivíl ida ne'ebé la merese atu rai kilat.

“Ha'u halo apela sirkulár ida ba maluk sidadaun sivíl sira ne'ebé subar kilat lakohi fó sai prazu to’o de'it 31 Dezembru. Liu ida ne’e konsidera hanesan krime ona” dehan Somotxo, iha Portu-Dili, horisehik.

Nia hatutan, iha Timor atu lori no rai kilat ne’e so instituisaun rua de'it mak PNTL no F-FDTL, maibé kuandu sivíl mak rai fali kilat ne’e iha intensaun ruma.

Nia konta, uluk funu laran rai kilat atu halo funu, maibé ukun aan ne’e mak sidadaun sivíl sira sei rai nafatin kilat, ne’e ho objetivu atu destrui estabilidade.

Kuandu liu data limitasaun ne'ebé determinadu ona, maka parte seguransa no defeza sira mak kaer toman ne’e sei simu konsekuénsia ne'ebé boot no sei hataan ba justisa.