Maski nune’e, polítika hirak ne’e hetan reasaun husi Bloku Koligasaun (BK). Konsidera aprezentasaun projetu lei tranzitóriu orsamentál ne’e kompeténsia absoluta órgaun ezekutivu nian.

Prezidente Bankada FRETILIN, Francisco Miranda Branco hatete, Konstituisaun define klaramente kompeténsia atu aprezenta projetu lei orsamentu rejime tranzitóriu la'ós inisiativa husi Parlamentu Nasionál, maibé podér husi governu.

Nia hatutan, Parlamentu Nasionál só iha inisiativa ba alterasaun lei jestaun finanseira nian. Tanba ne’e, buat hotu-hotu ne'ebé ko’alia kona-ba orsamentu ne’e inisiativa husi governu mak aprezenta orsamentu.

“Konstituisaun la fó dalan inisiativa orsamentu mai husi PN, maibé inisiativa ba lei bele”, dehan Branco, iha Uma Fukun PN, horisehik.

Nia hatutan, bloku opozisaun hafoin rejeita tiha OR, sira preokupa ona tanba ekonomia komesa resesu. Tanba ne’e, buka meius hodi normaliza, maibé laiha ona dalan.

Tanba ne’e, haree katak kompeténsia eskluziva governu nian ne'ebé laiha dalan atu PN halo, maibé agora sira obriga hodi halo tanba sira hatene ona situasaun povu nian iha baze.

Hataan ba ida ne’e, Prezidente Bankada CNRT, Arão Noe de Jesus hatete, bloku opozisaun AMP iha inisiativa sei aprezenta projetu lei rejime tranzitóriu ba ezekusaun duadesimal .

Inisiativa ne’e hanesan komplementár rejime duadesiamal ne'ebé vigora hela, atu nune’e governu bele uza hodi halo jestaun ba situasaun estraordinária.

Kuandu VII Governu la konsege prepara OJE 2018, AMP lakohi atu altera anu fiskál. Ne’e duni, mantein atu halo rejime tranzitóriu ida atu bele uza duadesimu ne’e hodi hein OJE 2018 tama iha vigór.

“Ida ne’e ami nia senáriu proposta atu salva guarda Estadu ne’e labele monu ba diverjénsia”, dehan Arão.

Nia hatutan, projetu lei rejime tranzitóriu ne’e hanesan atu asegura Estadu ne’e, tanba duadesimu ne’e só kobre de'it fulan Janeiru no Fevereiru.