"Liu husi kalan Natál ne'e ita sarani hotu-hotu tenke halo orasaun hodi husu ba Aman Maromak atu haraik dame no domin mai ita nia lider sira atu rezolve lalais ita nia problema polítika", dehan Amu parókia Santu António Motaél, David Alves, iha ninia omilia, iha Misa Santa Natál (24/12).

Nia hatutan, Iha tempu Natál prezensa kosok-oan Jesus mai hamutuk ho sarani sira iha mundu lori dame, pás, domin. Tanba ne'e, iha tempu Natál tenke hadomi malu.

Nia husu ba sarani timoroan tomak atu kontinua reza ba rai doben Timor atu hakmatek iha pás nia laran.

Nia mós husu ba sarani sira atu tuur hakmatek hodi hala'o nia atividade baibain. Labele monu ba tentasaun ema nian hodi halo hahalok ne'ebé kontra Maromak nia doutrina.

Tuir observasaun diáriu ne’e nian iha terrenu, iha misa kalan Natál sarani Katólika lubun ida partisipa hodi simu kosok-oan Jesus.

Iha misa ne'e la'o hakmatek tanba hetan seguransa másimu husi PNTL unidade tránzitu hamutuk ho organizasaun THS-THM.