Ne’e duni, atu fortifika pozisaun ne’e, Xefe Estadu Maiór Jenerál F-FDTL, Majór Jenerál Lere Anan Timur husu ba governu foun atu kontinua fó konfiansa ba Xanana Gusmão hodi defende nafatin direitu povu Timor-Leste nian iha internasionál.

“Ha’u nia komprensaun, ita nia maun Xanana tenke tuur iha negosiasaun ne’e hanesan ministru. Labele kualkér sidadaun”, dehan nia, iha Palasiu Prezidensiál, Ai-Tarak Laran, horisehik.

Lere dehan, importante tenke defende didi'ak ba Timor-Leste ninia soberania ne'ebé Xanana Gusmão luta hela ba.

Ne’e duni, komandante F-FDTL ne’e apela ba ukun na’in sira atu ukun ho responsabilidade ba nasaun no Estadu labele kahur ho interese partidáriu no grupu nian.

Kona-ba formasaun VII Governu Konstitusionál nian, eis gerrilleiru ne’e laiha duvida ba tanba konfia lider antigu sira hanesan Mari Alkatiri, Xanana Gusmão, José Ramos Horta, Francisco ‘Lú-Olo’ no Taur Matan Ruak.

Ne’e duni, Lere rasik fiar katak senáriu no polítika ne’ebé atu halo ba iha formasaun governu foun ne’e sei la fó impaktu no la impede dezenvolvimentu nasaun ninian.

Antes ne’e, partidu mais votadu, FRETILIN, liu husi ninia Sekretáriu Jerál, Mari Alkatiri, deklara ona katak ba prosesu negosiasaun Tasi Timor nian kontinua fó konfiansa ba Xanana Gusmão hodi lidera.

Ne’e duni, hafoin halo suru-mutu ho Xanana Gusmão, iha Sesta (18/8), Negosiadór Prinsipál Tasi Timor ne’e kontinua hala'o ninia mandatu hodi defende soberania nasaun nian iha Segunda (21/8).