Tuir nia, situasaun ne’e tuir loloos la akontese bainhira Deputadu Parlamentu Nasionál sira iha ona maturidade polítika hodi tuur hamutuk ho estudante husi husi organizasaun Movimentu Universitáriu Timor-Leste (MUTL) hodi buka solusaun hamutuk.

“Tantu Parlamentu Nasionál, tantu universitáriu sira hanoin didi'ak karik ha'u hanoin buat ne’e la mosu”, tenik Lere, iha Palasiu Prezidensiál, Ai-Tarak Laran, horisehik.

Tuir nia, loloos MUTL labele ansi tanba problema leilaun karreta ne’e problema sekundária atu rezolve lalais, tanba importante liu mak forma Parlamentu Nasionál no Governu.

La’ós ne’e de’it, delimitasaun Fronteira Tasi Timor mós sai importánsia ba nasaun ne’e.

Ne’e duni, informa ba MUTL tenke hanoin didi'ak saida mak prioritáriu.

Tanba ne’e, tenke kuidadu ho sasán sira ne’e, tanba oras ne’e Timor-Leste mós luta hela ba soberania tasi entre Austrália ho Timor-Leste kona fronteira marítima.

“Tanba ne’e ita nia inimigu aproveita buat hotu-hotu atu atinji ninia objetivu, ne’e mak ita tenke kuidadu. Ne’e dehan ita bolu sentidu de Estadu”, katak Lere.

Maski nune’e, problema ne’e rezolvidu no situasaun ultrapasa ona. Problema ne’e mós ki’ik la’ós akontese hanesan krize 2006 liubá.