Lere Alerta Prevene Infiltrasaun Terrorista Featured

By Tomé Amado Maiu 18, 2018 1723
Lere Lere

DILI: Grupu terrorizmu hahú lansa bomba iha nasaun viziñu Indonézia. Ne’e duni, Komandante Jerál FALITNIL-Forsa Defeza Timor-Leste (F-FDTL), Majór Jenerál Lere Anan Timur, alerta ba Estadu atu bele prevene infiltrasaun terrorista mai Timor-Leste.

Xefe Estadu Maiór Forsa Armada hateten, Timor-Leste agora preokupa mós asaun terrorizmu ne'ebé akontese iha Indonézia. Tan ne’e, Governu ne'ebé sei iha podér tenke kria kondisaun iha fronteira terestre, aereo no maritima.

“Ami ne'ebé toman ona haree raan buat sira ne’e baibain de’it. Maibé, maluk sira seluk nunka haree raan sira tauk. Tan ne’e ami preokupa”, dehan nia, iha Kuartél Jerál F-FDTL, Fatuhada-Dili, horisehik.

Eis gerrilleiru ne’e husu ba governu atu kria meiu ho kondisaun para bele prevee situasaun sira ne’e hodi labele akontese kazu hanesan iha nasaun ne’e.

“Ita haree iha Surabaia polisia halo auto stop ba ema derrepente bomba nakfera iha polisia nia oin”, dehan nia.

Ne'e duni, governu ne'ebé sei iha kbiit hodi jere rai ne’e tenke toma medida ruma, para oinsá bele tau konfiansa ba forsa defeza atu kumpre misaun ho responsabilidade ba situasaun ne’e.

Entretantu, Komandante Jerál Polisia Nasionál Timor Leste (PNTL), Komisáriu Júlio da Costa Hornay, reforsa mós katak planu antesipasaun kona-ba akontesimentu iha Surabaia, Komandu mós alerta ona antesipasaun ba Unidade Polisia Fronteira (UPF) atu halo vijilánsia hodi deteta identifika no asegura ema estranjeiru ne'ebé deskonfia.

Maibé, planu antesipasaun ne’e la'ós de’it polisia mesak, presiza mós apou husi povu tomak. Nu’udar timoroan iha obrigasaun informa ba malu kuandu deskonfia ema foun ruma iha bairru tenke informa imediatamente ba polisia.

Rate this item
(0 votes)

Independente Digital TV