Maske la hatudu klaru see, maibé Portavoz Jerasaun Patriota Marcolino Francisco da Costa “Kadalak” hatete, ema ne’ebé uluk nia inan-aman faan fiar ba rai ida ne’e no daudauk ne’e hetan oportunidade di’ak tenke mós hatudu komportamentu ne’ebé di’ak.
“Oan sira ne’ebé mak mai hetan oportunidade iha rai ne’ebé mak imi-nia inan-aman trai, tenke komporta imi-nia hahalok didi’ak, agradese tanba imi bele hetan fatin hodi haman an, hodi atende ba imi-nia nesesidadae familia nian. Buat ne’ebé imi nia inan-aman sira halo ida ne’e passadu ne’ebé mak liu ona ho rekonsiliasaun ne’ebé ita halo ona” dehan nia Kadalak iha sede Jerasaun Patriota, Segunda (10/08).
Nia afirma, ba Timor-oan tomak ne’ebé daudauk ne’e nia inan-aman sira serbisu ativu iha Indonezia no hetan oportunidade iha TL atu tenke hala’o serbisu ho di’ak, tuir lei no orden.
“Karik ita hotu hetan oportunidade mai iha rai ne’e, komporta didi’ak, imi-nia hahalok no atetude sira, hatudu imi-nia profisionalizmu, serbisu tuir lei no orden,” dehan portavoz ne’e.
Kadalak dehan, buat ne’ebé FMTL halo ne’e tuir lei no lei fó dalan ba sira atu hatama karta ba Ministériu Justisa hodi husu konkordansia atu hapara esbosu kriminaliza difamasaun.
Maibé, lamentavel tebes ho atuasaun husi pesoal PSIK hasoru reprezentante manifestante sira ne’ebé hakarak follow up sira-nia karta.
“Saida mak Adino N. Cabral halo ida ne’e hanesan hahalok ida ne’ebé mak ema hotu-hotu hakribi. Ha’u hanoin nia mós tenke hatene saida mak ninia serbisu. Hahalok ne’e hanesan aktu ida ne’ebé mak tenta atu impede povu nia lian ba iha governante sira,” dehan Kadalak.
Iha fatin hanesan, membru Jerasaun Patriota, Erminio Xavier lamenta ho atuasaun ne’ebé PSIK halo hasoru reprezentante FMTL.
Nia mós kestiona deklarasaun husi Adjuntu Diretór PSIK ne’ebé hatete sira-nia asaun bazeia ba orientasaun.
“Adjuntu PSIK deklara katak sira simu orientasaun, maibé ita la hatene sira simu orientasaun husi ne’ebé, husi Ministru ka husi nia gabinete ka husi see? Ita presiza identifika klean liu tan atu labele julga husi parte ida de’it,” dehan nia.
