Iha aprensaun ne’e PSIK mós kaptura suspeitu na’in tolu inklui timoroan ida hodi prosesu tuir lei.
Materiál prima ne’e importa husi kompañia Elon Pasífiku, husi nasaun Xina parseria ho kompañia timoroan balun. Sasán hirak ne’e tama ona postu Dili iha semana rua liubá ho ró naran ANN.
Sasán sira ne’e ninia alvu mai duni Timor para atu produs hodi fa’an fali ba peskadór sira.
Sasán hirak ne’e sei fó impaktu negativu ba ikan no ahu-ruin sira iha tasi laran, PSIK liu husi ninia ekipa intelijen deteta konteiner rua ne’e no ikus mai halo buska aprensaun.
Entretantu, liu husi pájina ofisial facebook Alfándega Timor-Leste, relata katak, Alfándega TL halo inspesaun ba konteiner rua (2) mai husi Xina hetan Ammonium Nitrate Phosphate.
Tanba sensitividade husi materiál ne'e, CUSTOMS TEAM TL sei la publika razaun prende materiál sira ne'e. Ne’e duni, hein investigasaun mak bele determina objetivu husi importasaun ne'e.
Jornalista diáriu ne’e tenta halo konfirmasaun ho Adjuntu Diretór PSIK, Adino Cabral, iha portu Dili, maibé nia rasik rejeita ho informasaun ne’e.
Nia dehan, informasaun ne’e sei espekulasaun, depois halo investigasaun no teste laboratóriu mak foin bele identifika klaramente materiál hirak ne’e.
“Ita hein lai rezultadu husi investigasaun no sampel ne'ebé PSIK foti depois ninia rezultadu mak ha’u foin bele ko'alia”, tenik Adino.
Entretantu, PSIK mós kaptura sidadaun na’in tolu, rua husi estranjeiru no ida timoroan. Suspeitu sira detein ona PSIC durante oras 72 molok aprezenta ba interrogatóriu dahuluk.
Iha portu Dili, suspeitu ida ho naran Key husi Malázia hateten, konteiner rua ne’e iha ona portu Dili semana rua. Maibé, nia prosesu mak tarde to’o hetan buska husi Polisia.
Nia rekoñese sasán sira ne’e sei produs fali ba instalasaun bomba para atu tuda ba ikan sira bainhira halo peska.
Diáriu ne’e mós tenta konfirma ba parte Alfándega nian maibé la prontu atu fó informasaun.
Portantu husi buska ne'ebé PSIK halo ba konteiner rua ne’e maizumenus iha tuku 11:00 meiudia, iha loron Segunda 26 Fevereiru 2018.
