Ministériu Públiku deside empreza jogu ho inisiál MH sai arguidu tanba deskonfia envolve krime tráfiku umanu no violasaun seksuál ba labarik ho idade ki’ik na’in haat.
Violasaun seksuál hasoru labarik menoridade hirak ne’e liu husi mata-dalan ema na’in rua nian mak hanesan FC no S.
Nune’e, labarik sira ne’ebé deskonfia sai vítima violasaun seksuál emprezáriu jogu ne’e mak hanesan ODO (15) no LCT (14), EV (13) no LM (15).
Iha julgamentu ne’ebé taka ba públiku, Tribunál rona deklarasaun husi vítima ODO no LCT, maibé iha audiénsia ne’e vítima LCT la marka prezensa tanba sei tuir hela ezame iha eskola.
Antes ne’e, Tribunál hala’o ona julgamentu ba dala rua (2) iha loron 22 Fevereiru no 27 Fevereiru 2018 hodi rona deklarasaun husi vítima EV.
Hafoin rona deklarasaun husi vítima ODO, Tribunál Distritál Dili (TDD) deside hodi adia julgamentu ba loron 6 Abríl 2018 hodi kontinua rona deklarasaun husi vítima LCT no testemuña sira seluk.
Audiénsia julgamentu ne’e prezide husi juis singulár Maria Modesta, Ministériu Públiku reprezenta husi prokuradór Renato Bere Nahak, arguidu sira hetan asisténsia husi defensór públiku Marçal Mascarenhas no Fernando Carvalho.
