DILI: Polisia Nasionál Servisu Investigasaun Nasionál (PNSIK) aprezenta ona kazu difamasaun ida ne'ebé komete husi suspeitu MPE ba Ministériu Públiku (MP) atu prosesa tuir lei.

Kazu difamasaun hasoru lider nasionál sira iha média sosiál hetan ona intervensaun husi SIC. Husi prosesu investigasaun ne'ebé loke kuaze suspeitu na’in 7 mak aprezenta-aan iha Kuartél Jerál PNTL hodi presta deklarasaun.

Ofisiais PNSIK ne’ebé lakohi temi naran, Tersa (20/03) hateten, kazu ne'ebé PNSIK aprezenta ba MP mak suspeitu ida husi Bebonuk ho inisiál MPE ne'ebé ataka lider nasionál no atuál Primeiru Ministru, Mari Alkatiri ho liafuan mal edukadu.

Suspeitu durante ne’e eskola iha li'ur, maibé sempre akompaña prosesu no lala'ok polítika iha rai laran. Tanba tensaun polítika ne'ebé aas, MPE mós brani halo ninia asaun hodi ataka lider nasionál sira.

Nune’e, kazu Remígio Laka Vieira nian, tuir nia, iha mós indikasaun kontra lei. Tanba utiliza eletróniku no kondenasaun, ne’ebé posibilidade sei aprezenta mós ba ministériu públiku.