Diretór Ezekutivu AJAR José Luis Oliveira konsidera ekipa PSIK ne’ebé reprezenta MJ hodi ko’alia ho manifestante sira, tama sala, tanba sira-nia serbisu la’os atu kombate manifestante, maibé atu kombate krime organizadu.

Nia dehan, asaun husi PSIK hasoru reprezentante manifestante sira husi FMTL ne’e iregularidade ida ne’ebe kontra knar PSIK nian rasik, tanba PSIK nia mandatu laos hala’o knar hanesan polisia protesaun pessoal ba MJ Carceres.

“Iregularidade ne’e PSIK komete beibeik ona. Se situasaun ne’e mak repete ba bebeik di’ak liu PSIK ne’e ita la presiza ida, di’ak liu bubarkan tiha de’it,” dehan José Luis ba jornalista Jornal INDEPENDENTE iha nia knar fatin, Kuarta (05/08).

José Luis mós konsidera PSIK la merese atu reprezenta MJ hodi hasoru-malu ho manifestante sira, tanba maske nu’udar instituisaun estadu ne’ebé tutela ba Ministériu Justisa maibé la signifika tenke halo serbisu irarkiamente husi Ministru Justisa.

Nia hatutan, bainhira Ministru Carceres mak fó orden PSIK reprezenta MJ hasoru manifestante sira, signifika Ministru Carceres la hatene ninia lideransa no la hatene jere ninia administrasaun ho di’ak.

“PSIK ne’e instituisaun autonomu, mesmu ke nia tututela ba iha Ministériu Justisa maibé nia laos simu fali orden husi Ministru Justisa, no iha situasaun ne’e rasik Xefe PSIK ne’e rasik mak la komprende ninia kompetensia.”

José Luis esplika kona-ba mekanizmu loloos delegasaun kompetensia husi Ministru katak, bainhira ministru laiha fatin, delega kompetensia ba Vise Ministru hodi hasoru-malu ho reprezentante manifestante sira ka delega ba Diretór Jeral, tanba asuntu ne’ebé manifestante sira kestiona iha relasaun ho prosesu lejislasaun ne’ebé MJ trata.

“Delegasaun kompetensia ne’e tuir loloos se Ministru laiha delega ba iha Vise Ministru, se Vise Ministru laiha delega ba iha Diretór Jeral sira par ba hasoru manifestante sira, laos haruka fali PSIK mak mai.”

“Manifestasaun ne’e nu’udar komunikasaun politika, nia laos krime, iha ita-nia konstituisaun ne’e manifestasaun ne’e laos krime, uluk iha tempu Soeharto ne’e mak krime, mais agora ne’e lae,” nia hatete.

Antes ne’e, Jornal emprime ho online INDEPENDENTE tenta halo konfirmasaun ba Adjuntu Diretór PSIK, maibé nia lakohi fó komentariu no nia eskoltu mós duni jornalista ne’ebé koko nafatin halo intrevista.

Polísia Sientífika Investigasaun Kriminál (PSIK), harii iha tinan 2014, kompostu husi investigadór 47 no peritu forense nian hamutuk 31, sira hotu formadu iha ámbitu programa ida ne’e nian, iha estratéjia ida ne’ebé hala’o liuhusi formasaun iha Timor-Leste no iha Eskola Polísia Judisiária nian, iha Portugal.

Estadu no Governu harii ho nia objetivu atu haree liu ba krime ne’ebé organizadu, modernizadu, no kompleksu liu. PSIK hanesan Instituisaun Superior ba Investigasaun Kriminal, ne’ebe ho nia misaun mak atu apoiu administrasaun justisa, orgaun justisa, hodi bele haree ba dezafiu sosio- ekonomiku ne’ebé Nasaun hasoru, maibé krime simples sira seluk hanesan violensia domestika, asaltu integridade fijika simples, ne’e PNTL mak sei halo investigasaun.