Diretór Ezekutivu AJAR, José Luis Olveira hatete, loloos Prezidente Repúblika Francisco Guterres Lú Olo ne’ebé nu’udar aman ba nasaun tenke besik ba ninia povu, maibé realidade la akontese, no knar ne’e foti fali husi Xanana.
Nia hatete, Xanana halo buat ida ne’ebé povu dezeza tebes atu iha lideransa sira iha situasaun ida hanesan ne’e bele besik sira.
“Governu ida agora Ministru barak tebes, deputadu mós barak tebes, sira sulan aan de’it iha ne’ebá. Agora dehan atu ba vizita povu de’it nia preokupa osan laiha, tuir loloos ne’e kna’ar Prezidente Repúblika nian, Prezidente Repúblika nu’udar aman ba nasaun tenke besik ba ninia povu, maibé infelizmente ida ne’e la akontese,” dehan Luis iha nia kna’ar fatin, Segunda (10/08).
Nia dehan, iha situasaun hanesan ne’e povu dezeza tebes na’i-ulun sira hakbesik an ba sira, la’os tanba distansiamentu fiziku lider sira mós hadook an tan husi nia povu rasik.
“Situasaun ida EE ne’e labele hanesan ko’alia de’it ba povu iha televizaun de’it, fó diskursu ka saida, povu barak iha foho sira ne’e televizaun laiha, rádiu laiha, ne’e mak prezensa ne’e importante,” dehan nia.
Diretór Ezekutivu AJAR ne’e mós admira tanba sa mak Prezidente Repúblika Francisco Guterres Lú Olo la vizita povu.
“Se Prezidente Repúbliku nu’udar aman nasaun nian, tenke sente besik ba ninia povu, tuir ha’u nia observasaun, durante ne’e, se la sala, Prezidente Repúblika foin ba vizita dala tolu de’it, Vikeke, Suai ho Lospalos,” dehan nia.
Tuir nia, loloos, PR Lu Olo tenke hala’o vizita, pelumenus munisipiu 12 no RAEOA.
“Ita koalia aman ba nasaun intermus pozisaun formal, hanesan Xanana ema konsidera hanesan aman nasaun maibé nia pozisaun informal, maibé agora nu’udar pozisaun formal ita iha obrigasaun moral atu besik ba povu hodi rona no sente saida mak povu nia preokupasaun,” dehan nia.
Entretantu, Xanana Gusmão kontinua hala’o nia asaun karidade hodi apoiu kbiit laek no defisiente sira iha Timor laran tomak.
Iha asaun refere, Xanana mós aproveita hodi husu ba komunidade sira atu kontinua hadook an husi Covid-19.
