Komandante Daruak PNTL Dili, Superintendente Polisia Euclides Belo hatete, PNTL Dili simu keisa husi vitima na’in haat ne’ebé ema sosa sira-nia sasan ho osan falsu ho valor $20.

Iha loron hirak liu ba, nia hatete, nia parte simu keixa husi negosiante balun kona-ba osan falsu ne’ebé sira simu husi ema balun.

"Osan falsu ne’ebé mak dadaun ne’e sirkula nia folin $20 dollar, tanba osan $20 dollar ne’e ema bele kopia tuir, tanba ne’e mak husu ba publiku kuandu simu osan $20 dollar tenke verifika didi’ak," dehan Euclides ba jornalista sira iha nia knar fatin, Kaikoli, Segunda (10/08).

Tuir informasaun ne’ebé polisia simu, nia hatete, ema sira ne’ebé produs osan falsu, sosa sasan iha ferik no katuas sira ne’ebé sira-nia matan hahú fraku ona.

"Ema sira ne’e buka katuas ho ferik sira ne’ebé mak faan sasan, no sira ne’ebé matan haree osan la moos ona,” dehan nia.

Tan ne’e, nia husu ba komunidade sira atu fó informasaun ba polisia bainhira deskonfia ka identifika ema balun ne’ebé uza ka produs osan falsu.