Tuir nia, iha estadu emerjensia faze dahuluk, governu iha razaun klaru katak iha momentu ne’ebá iha kazu pozitivu Covid-19 iha TL.

“Mai ha’u-nia haree laiha nesesidade, se karik governu preokupa atu kontrolla ema tama-sai iha fronteira, governu bele foti medidas administrativu ruma hodi estabelese kuarenta iha ne’ebá, ema tama mai ne’e tanba situasaun estraordináriu, iha mundu aplika buat ida ne’e, neduni la nesesáriu atu deklara estadu emerjensia,” dehan Luis ba jornalista sira iha nia kna’ar fatin, Faról, Segunda (03/08).

Aleinde ne’e, Luis dehan, nia sente estrañu uitoan ho fundu Covid-19 ne’ebé PN aprova ona maibé to’o agora ekipamentu ba kombate Covid-19 nian seidauk mai.

“Dala-ruma AJAR dúvidas ho seriédade governu nian dehan atu kombate Covid-19 ne’e loos ka la’e. Iha Estadu Emerjensia (faze I to’o III) deklara tiha, husu tiha fundu Covid-19 ne’e, maibé ekipamentus la sosa, agora fundu sira ne’e ba ne’ebé?”.

Nia hatutan, sera que, fundu sira sustenta fali atividade governu, tan ne’e tenke husu fali EE dahaat tanba OJE laiha.

“Buat barak ne’ebé AJAR la hetan informasaun loloos husi governu. Tanba la hetan mak ema sempre deskonfia no sempre iha hanoin politizasaun ba asuntu ne’e, tanba governu la komunika di’ak ho públiku kona-ba asuntu ida ne’e,” nia dehan.