Diretór Ezekutivu AJAR, José Luis Oliveira hatete, maske RNDJ-KRDTL iha liberdade atu halo, maibé inprisipiu meius ne’e nu’udar meius inkonstitusional.
“Door to door ne’e sira-nia liberdade, maibé prosesu mak hanesan ne’e, agora sira hakarak uza dalan ida ne’ebé? Se uza dalan konstituisionál mak hanesan ne’e, tenke ba Parlamentu no Parlamentu aprova maiória ba tribunal. Se uza dalan inkustituisionál mak hanesan door to door, ba bolu ema mai, obriga mai, ba obriga Prezidente tuun de’it, ida ne’e dalan inkonstituisionál, ne’e dalan la tuir konstituisaun, atu lori forsa ba obriga de’it, ne’e la tuir konstituisaun,” dehan Luis iha nia kna’ar fatin, Segunda (10/08).
Maske konsidera ida ne’e nu’udar sidadaun ninia liberdade, maibé AJAR xama atensaun katak Timor-Leste sei sai hanesan nasaun seluk ne’ebé to’o ohin loron laiha estabilidade.
“Se ida ne’e mak konsege mak Timor fila fali ba moris hanesan Gunea Bisau to’o agora estabilidade laiha, tanba ida sa’e, ida lori forsa ba hatuun, hanesan ne’e hela de’it,” dehan nia.
