Liu husi komunikadu imprensa ne’ebé jornal INDEPENDENTE asesu, Segunda (03/08), parte governu informa, iha reuniaun KM foti ona desizaun hodi propoin ba PR Lu Olo atu deklara EE.
“Konsellu Ministrus hala’o sorumutuk iha Palásiu Governu, iha Dili, no delibera atu propoin ba Sua Exelénsia Señór Prezidente Repúblika, Francisco Guterres Lú Olo, deklarasaun estadu emerjénsia durante loron tolu-nolu,” informa komunikadu husi palasiu governu.
Razaun husi governu propoin EE tanba haree ba evolusaun ne’ebé hamosu preokupasaun husi situasaun epidemiolojika no proliferasaun kazu kontájiu Covid-19 ne’ebé rejista to’o agora, tantu iha nivel rejional no mós nivel mundial.
Atu bele neutraliza risku Covid-19 daet no habelar to’o Timor-Leste, governu deside hodi propoin tan ba PR Lu Olo atu deklara estadu emerjensia.
“Au nune’e bele neutraliza risku atu SARS-COV-2 labele da’et no habelar, nune’e proteje saúde públika no kapasidade resposta nian husi Sistema Nasionál Saúde nian, Governu propoin ba Señór Prezidente Repúblika atu, ho deklarasaun estadu emerjénsia, bele permite suspensaun no restrisaun ba direitu atu halo sirkulasaun internasionál, direitu ba sirkulasaun no fikasasaun rezidénsia no rezisténsia,” esplika governu.
Hafoin reuniaun KM, Ministru Presidensial Konselu Ministru (MPKM) Fideles Leite Magalãens informa, foku EE ba dala haat ne’e mak restrisaun ba direitu atu halo sirkulasaun internasionál, direitu ba sirkulasaun no fikasasaun rezidénsia no rezisténsia
“Governu sei foku ba iha posibilidade restrisaun ba direitu tolu ne’e, atu dehan katak populasaun labele preokupa atividade loron-loron nian, la’o babain, buat hotu iha ita-nia rai laran ne’ebé relaxa ona ho estensaun estadu emerjensia antes ne’e nafatin, maibe preokupasaun boot liu mak sirkulasaun internasional no fikasasaun rezidensia no direitu ba rezistensia,” Fidelis esplika.
Tuir nia, dalan di’ak liu atu fasilita ezekutivu no garante ezekutivu iha poder atu halo atuasaun, liu-liu atu restende direitu sidadaun nian, mak governu husu dala ida tan estensaun estadu emerjensia ba PR.
“Sidadaun sira ne’ebé tama sei halo avaliasaun ba direitu izolamentu kuarentena no taka zona tertentu, buat sira ne’e hotu presiza deklarasaun estensaun estadu emerjensia, se laiha governu labele hatur interese no orden sira hanesan ne’e,” dehan nia.
Hafoin KM foti desizaun, Fidelis dehan, Primeiru Ministru sei hakerek karta ba Prezidente Repúblika no bainhira PR aseita, sei haruka ba Parlamentu Nasionál hodi husu autorizasaun.
Molok ne’e, Prezidente Repúblika Francisco Guterres Lu Olo dekreta ona Estadu Emerjensia (EE) dala tolu.
EE faze dahuluk hahú implementa iha 28 Marsu no remata iha 26 Abril 2020. Hafoin, PR Lu Olo dekreta tan EE faze daruak iha 27 Abril no remata iha 27 Maiu 2020, no ba faze EE datoluk hahú iha 28 Maiu no remata iha 26 Juñu 2020.
