Iha manifestasaun loron dahuluk ne’ebé organiza husi Front Mahasiswa Timor-Leste (FMTL), reprezentante manifestante sira intrega akta konkordansia ida ba parte resepsionista Ministériu Justisa hodi bele intrega ba MJ Caraceres.
Koordenadór Kampu FMTL Joselino Pereira kestiona deklarasaun MJ Carceres ne’ebé hatete katak kriminaliza difamasaun laos prioridade ba MJ.
Tanba, nia dehan, se la importante tanba sa mak MJ Carceres halo esbosu alterasaun kriminaliza difamsaun atu hamate liberdade espresaun no liberdade imprensa iha Timor-Leste.
“Ita haruka akta konkordansia ida ba iha Ministru Justisa Señor Manuel Carceres hodi obriga nia atu assina akta konkordansia ne’e atu nune’e nia bele responsabiliza nia klarasaun ne’ebé nia halo katak kriminaliza difamasaun ne’e laos ona sai prioridade,” dehan Joselino iha Liceu, Segunda (03/08).
Iha akta konkordansia ne’e hakerek razaun husi manifestante sira halo asaun pasifiku no husu ba Ministru Justisa atu prova ninia lia-fuan ne’ebé deklara iha televizaun nasional balun katak esbosu kriminaliza difamasaun ne’e la’os prioridade, liu husi karta komprovas legais.
Ho nune’e, iha karta ne’e mós manifestante sira “obriga” atu MJ Carceres asina deklarasaun ida ne’ebé hatete katak MJ Carceres kompromete atu hapara esbosu kriminaliza difamasaun.
“Ha’u ne’ebé asina iha kraik, atual Ministro da Justiça, no ha’u kompromete katak sei hapara esbosu lei kriminaliza difamasaun ho imediatu. ‘Tanba ha’u hatene katak esbosu lei kriminaliza difamasaun la’os prioridade ba ha’u-nia mandatu iha VIII Governu Konstitusional’,” hakerek manifestante iha akta refere.
Hafoin intrega akta ne’e, manifestante sira kontinua hala’o asaun no rona mós deklarasaun husi reprezentante organizasaun hirak ne’ebé envolve iha asaun refere.
“Ohin ita halo ona asaun hasoru Ministru Justisa, no aban ita sei kontinua nafatin halo asaun to’o hetan resposta pozitivu husi Ministru Justica Señor Manuel Carcere,” deklara Portavoz Jeral FMTL.
Entretantu, molok ne’e iha intervista ho televizaun nasional ida, Ministru Jusitsa Manuel Carceres da Costa hato’o ninia agradesimentu ba sosiadade sivil, komunidade media, no Konsellu Imprensa, tanba sira-nia pensamentu kritika bele redefine pensamentu ba alterasaun kodigu penal Timor-Leste.
“Primeiru hakarak esklarese katak sei laiha lei ida mesak kona-ba difamasaun, saida mak ita buka agora, atu altera kodigu penal Timor-Leste, maibé espesialmente esbosu ida ke sai ne’e la’os prioridade ba oras ida ne’e,” dehan Ministru Carceres.
Prioridade ba governu, nia hatutan, mak lei organizasaun judisiariu, estatutu juiz, estatudu ministériu publika, estatutu defensoria publika, no orden arvogadu.
“Sira ne’e mak prioridade, kuandu ita iha ona lei organizasaun judisiariu implika alterasaun kodigu penal, kodigu sivil, kodigu prosesu penal, kodigu prosesu sivil. Se pur a kazu, iha alterasaun ida ne’e mak ita hanoin atu halo adita de’it krime kontra a onra, tanba .... ha’u moris, moris kedas ho ha’u-nia onra, ha’u mate lori ha’u-nia orna, la rai ba ha’u-nia oan sira.”
Ministru ne’e hatete, nia sente kontente tanba durante ne’e simu pareser barak ne’ebé konsege konvense nia hodi hanoin katak presiza duni redefine pensamentu kriminaliza difamasaun.
“Ha’u kontente tebtebes, ha’u simu pareser barak, i pareser hirak ne’e konvense ha’u, katak tenke redefisini pensamentu ida ne’e. (maibé) ha’u sente indagnadu i estrañu uitoan, autor pareser sira ne’e la fiar ba sira-nia an katak sira-nia pareser ne’e bele konvense governu, bele konvense ministériu justisa.”
“Ha’u simu pareser ne’e, ha’u simu ho kontente tebtebes, katak iha duni maluk Timor-oan sira ke hanoin pozitivu, kritiku, katak tenke liu husi dalan hanesan ne’e, infelismente na’in ba pareser ne’e mak sente inkomodadu ho sira-nia pareser rasik. Tanba ne’e mak ha’u ohin dehan hanesan ne’e, redefine pensamentu ne’e, i ida, laos prioridade ba governu,” nia afirma.
