“Komunidade sira ezije atu halo diálogu, maibé Prezidente Autoridade la marka prezensa,"dehan reprezentante komunidade RAEOA, Benjamín Tomás Pereira, liu husi diálogu ho Prezidente Repúblika iha Suku Cunha, Domingu (12/2).
Nia sente triste ho atitude ZEESM nian ne’ebé komunidade suku lima (5) mak hetan afetadu rai privadu. Nune’e, animál komunidade nian mós halai tanba impaktu husi projetu ZEESM nian.
Iha fatin hanesan, komunidade Suku Cuhna Henrique Sila hateten, rai ne’ebé oras ne’e sira hela fatin no plantasaun, maibé to’o agora Governu la selu indenizasaun. Tanba ne’e, komunidade sira konvida Prezidente ZEESM, maibé la hola parte diálogu.
Nune’e Komunidade Suku Cuhna, Maria Colo hateten, relasiona ho mega projetu ZEESM rai ne’ebé komunidade sira hetan afetadu to’o agora la selu indenizasaun. Ne’e duni, sira ezije atu bele konsidera povu ninia direitu.
Responde ba preokupasaun ne’e, Prezidente Repúblika, Taur Matan Ruak hateten, nia (Prezidente) la fo lisensa Governu foti de’it rai komunidade sira nian, maibé tenke selu ka fo indenizasaun.
“Governu labele foti de’it rai, tenke fo indenizasaun,” dehan nia ba komunidade sira.
Nia konta tuir komunidade sira iha Munisípiu Kovalima, ne’ebé afetadu ba mega projetu Suai Supply Base (SSB) no aeroportu Suai no auto-estrada iha Kovalima,
komunidade sira hetan indenizasaun husi Governu, hamutuk orsamentu kuaze tokon $5.8.
Tanba ne’e, Xefe Estadu lamenta ho atitude Autoridade ZEESM nian lakohi selu indenizasaun ba povu sira iha RAEOA.
Nia haktuir tan, durante ne’e, komunidade sira partisipa direita no indireta ba dezenvolvimentu projetu ZEESM, maibé prezidente autoridade ZEESM laiha konsiderasaun ba komunidade no la respeita komunidade sira.
Entretantu, Diretór Servisu Terras Propriedade (DSTP) RAEOA, Celestino Casenobe hateten, rai ne’ebé halo edifísiu no rezidénsia RAEOA nian, ne’ebé komunidade sira preokupa ne’e rai ne’e estadu nian ona.
Nia dehan, bainhira iha tinan 1999 mai, iha fatin ne’e mamuk, maibé antes atu implementa mega projetu iha fatin ne’ebá komunidade sira halo uma nakonu. Ne’e duni preokupasaun ne’ebé komunidade sira hato’o ne’e la loos.
Akresenta Celestino katak, mezmu fatin ne’e komunidade sira halo uma, laiha estatutu rai nian, maibé povu sira hela iha ne'ebá okupa fali entaun nasaun la autoriza sira halo uma, tanba rai ne’e estatutu laiha.
“Ita la haree estatutu rai, maibé ita haree husi povu ne’ebé okupa entaun nasaun la autoriza sira,” responde Celestino.
Nia dehan, karik maluk sira ne’ebé hetan afetadu, entaun tenke informa ba, depois bele halo sosializasaun ruma ba sira ne’ebé hetan afetadu.
Antes ne’e, Primeiru Ministru (PM) Rui Maria de Araújo rekoñese katak, lei seidauk iha no mós lei titulár ba rai nian mós seidauk iha atu rekompensa komunidade sira nia rain.
“Se ita haree loloos ne’e iha lei nia oin ema ida seidauk bele reklama rai ne’e sira nian ka lae,” dehan PM Rui, iha Palasiu Prezidensiál, Ai-Tarak Laran, horisehik.
Nia dehan mekanizmu temporariu, hein de'it husi Parlamentu Nasionál aprova dekretu rai sira ne’e depois mak sei haree saida mak bele halo ba oin.
