Sansaun AFC ne’e relasiona ho falsifikasaun dokumentu jogadór naturalizasaun hamutuk na’in 12 hodi defende ekipa futeból selesaun nasionál.

Antes ne’e, iha tinan hirak kotuk amante ho ninia aliadu sira hala’o asaun pasifika hodi ezije halo mudansa ba estrutura iha FFTL, tanba deteta akontese erru balun. Maski nune’e, ezijénsia ne’e la hetan resposta no ikus mai AFC rasik mak deteta hodi fó sansaun ba FFTL.

Situasaun ne’e sai preokupasaun boot ba bola mania sira iha Timor-Leste. Ne’e duni husu dirijente FFTL tenke responsabiliza ba aktu ne’e no mós ezije atu realiza kongresu estraordináriu hodi hili estrutura FFTL foun.

Maibé, hataan ba preokupasaun ne’e, Prezidente FFTL, Francisco Kalbuadi Lay ho mensajen badak hateten, hein de’it tempu to’o ona sira sei fó hatene.

Nune’e mós husu kona-ba problema ne’ebé daudauk ne’e FFTL enfrenta, nia dehan FFTL laiha problema ruma.

“Hein de’it tempu, sira haree hela no kuandu tempu to’o ona sira sei fó hatene no laiha problema 'sama sekali',” dehan Kalbuadi, iha Komoro, Sesta (10/2).

Federasaun Futeból Timor-Leste (FFTL) ofisialmente hetan blacklist husi FIFA liu husi Asia Football Confederation (AFC) hodi labele partisipa jogu iha Kopa Ázia nian to'o tinan 2023.

Sansaun ne'e FIFA hatún tanba identifika FFTL halo falsifikasaun ba dokumentu jogadór husi Brazíl.

Liga lokál konsege organiza di'ak ona, maibé agora tenke hasoru fali dezafiu foun tanba Timor-Leste labele joga iha eventu formál sira iha rejiaun ne'e.

Problema ne’e akontese tanba FFTL halo falsifikasaun dokumentu ba jogadór Brazileiru na'in 12 ne'ebé halo naturalizasaun, maibé ho karakter falsifika sira nia dokumentu hodi sai hanesan timoroan.

Sei La Tolera FFTL

Entretantu, reuniaun tripartida ne’ebé inisia husi Sekretáriu Estadu Juventude no Desportu (SEJD), iha Sesta (11/2), hodi buka solusaun ba problema futeból nian la hetan partisipasaun husi FFTL.

Ne’e duni, iha primeiru reuniaun ne’e Governu sei tolera auzénsia FFTL nian, maibé ba oin mak kuandu la partisipa nafatin Governu sei medida tuir ninia kompeténsia.

Tanba tuir lei baze desportu nian fó dalan ba Governu atu fó xamada ba federasaun ne’ebé jere la tuir estatutu.

Nia esplika, Governu la’ós atu intervein servisu FFTL nian, maibé konvida atu bele fó esplikasaun kona-ba sansaun ne’ebé AFC hamonu ba Timor-Leste.

Entretantu, tuir karta ne’ebé FFTL hasai, sira deside la partisipa iha enkontru tripartida tanba FFTL halo tuir de’it ninia estatutu no estatutu AFC-FIFA nian.

FFTL konsidera reuniaun ne’e hanesan julgamentu populár hasoru FFTL, tanba ne’e sira deside hodi lakohi partisipa.

FFTL rasik seidauk preparadu atu halo kongresu estraordináriu. Tanba ne’e, FFTL sei kontinua nafatin hala’o sira ninia funsaun hanesan baibain.