Segundu Komandu Jerál PNTL, Komisáriu Faustino da Costa dehan, iha fulan kotuk Komandu PNTL halo diskusaun hodi foti demisaun hasoru membru PNTL ne'ebé durante ne’e la ativu iha intuisaun PNTL to’o ohin loron.

“Membru 14 ne’e ita foti desizaun tanba sira balun la ativu iha instituisaun Polisia to’o ohin loron alende ne’e balun fila ba vida sivíl,” dehan nia, iha Kuartél PNTL Kaikoli-Dili, horisehik.

Nia dehan, membru sira durante ne’e maioria la ativu ona instituisaun PNTL no fila hikas vida sivíl, maibé durante ne’e nia naran sei ativu hela iha Komandu PNTL.

Faustino relata, tanba ne’e maka Komandu apresia servisu ba membru 14 ne'ebé tuir planu hodi halo demisaun ba sira tanba sira la ativu ona iha instituisaun.

“Ita sei aprezenta ba númeru sira ne'ebé atu atu hetan demisaun ba Ministru Interiór hodi foti desizaun,” dehan Faustino.

Nia dehan, bainhira membru polisia sira ne'ebé la hala’o nia knaar iha instituisaun PNTL, Komandu foti desizaun hodi haruka lista ba Ministériu Interiór atu haree ba kestaun ne’e.

Tuir Faustino, membru sira ne’e barak maka sai husi instituisaun hodi hala’o nia moris nu’udar ema sivíl, alende ne’e balun buka vida iha rai li'ur.

Tanba ne’e, Komandu mós kontinua orienta ba komandu munisípiu sira hodi buka tuir lista ba membru sira ne'ebé tinan barak ona la ativu iha instituisaun hodi nune’e haruka ba Ministériu Interiór atu foti solusaun ba sira.