Sira ida-idak organiza aan hodi ko’alia ‘segredu’, bainhira iha sesaun han meiudia nian, iha Sábadu (15/6). La klaru saida maka sira ko'alia, maibé informasaun ne’ebé diáriu ne’e hetan husi ema balun besik partidu KHUNTO katak, sira obstaklu no dezafiu boot ba governasaun.
Fonte ne’e dehan, Konselleiru Másimu KHUNTO, José ‘Naimori’ Bucar ne'ebé partisipa iha avaliasan ne’e ‘tilun mean’ kuandu rona kritika barak mai husi CNRT no PLP. Tan ne’e, la simu hodi kria kedas enkontru ‘alargada no sekretu’ ho ninia membru sira.
Situasaun la armonia hatudu iha momentu han meiudia nian. Bainhira Primeiru Ministru, Taur Matan Ruak, konvida Naimori atu ba han hamutuk, maibé nia rejeita.
Bainhira atu ba han meiudia, lider másimu Partidu KHUNTO ne’e bolu hotu ninia membru sira ho lian makaas, inklui Ministra Solidariedade Sosiál no Inkluzaun (MSSI), Armanda Berta dos Santos, ne’ebé mós nu’udar ninia espoza.
“Ha’u dehan sa’e ona karreta”, hateten Naimori ho lian makaas bainhira bolu atensaun ba Ministra Armanda, iha iha Hotel Golgota, Sábadu (15/6).
Fonte ne’e dehan, destinu KHUTO nian la kleur ona. Planu atu hamosu remodelasaun mós sei realiza iha tempu besik. Bele troka membru governu balun ka bele harahun bloku AMP hodi forma governu unidade Nasionál.
Iha avaliasaun loron rua nian situasaun la'o hakmatek, membru Partidu KHUNTO kontinua partisipa, maibé haree husi oin la hatudu sira ninia vontade di'ak.
Akontesimentu ne’e bele nota husi tempu pauza kafé nian, membru KHUNTO sira han no hemu lalais depois dezvia-aan husi kafetaria hodi sai mai dada lia ho partisipante sira seluk ne’ebé sira fiar.
Ezemplu, Vise Ministru Obras Publika (VMOP), Nicolau Lino Freitas Pereira, hadook-aan husi ema seluk hodi tuur mesamesak ho ninia kolega deputadu KHUNTO nian ida no ko’alia ‘bisibisi’ ba malu.
Entretantu, Konselleiru Másimu Partidu KHUNTO, Namori, rejeita sira sees-aan hodi halo enkontru sekretu, maibé tanba sira tenke ba partisipa serimónia importante balun.
“Informasaun ne’e la loos. Horisehik (Sábadu (15/6)), meiudia ne’e, ami ba hotu Likisá tanba atu partisipa serimónia funerál alin polisia ida ne’ebé mate tanba xoke bibi”, tenik nia.
Ne'e duni, informasaun kona-ba problema kritika malu katak KHUNTO mak sai obstaklu ne’e la loos.
Tanba hafoin serimónia, membru sira kontinua fila mai partisipa avaliasaun, inklui Domingu (16/6) mós kontinua partisipa.
Nune’e, informasaun ne’ebé rekolla husi fonte seluk iha reuniaun ne’e katak, membru balun sees-aan husi enkontru ne’e tanba ‘ta'uk’ kritika durante tempu avaliasaun nian.
Membru Governu sira ne’e sai husi reuniaun ho razaun servisu importante, maski nune’e enkontru ne’e importante tebes hodi bele avalia sira ninia servisu durante tinan ida nia-laran.
