Rezolusaun ne’e mós taka ho pontu dezkonfiansa ba Prezidente Autoridade Rejiaun Autonomu Espesial Oekusse-Ambeno (RAEOA), Mari Alkatiri.
Tuir mai rezolusaun kompletu husi AMP ne’ebé jornal INDEPENDENTE asesu iha Tersa (18/06).
Hosi loron 15 too 16 fulan Junu tinan 2019, Konsellu Diretiva Aliansa Mudansa ba Progessu (AMP) halao Konferensia Nasional AMP ho objetivu halo avaliasaun profunda hodi konsolida servisu no lala’ok AMP, VIII Governu Konstitusionál no Parlamentu Nasionál, ao mesmo tempo promove estabilidade no impulsiona dezenvolvimentu nasional.
Konferensia nee hamosu rezolusaun ida nebe hetan aprovasaun ho unanimidade/aklamasaun ho nia konteudu hanesan tuir mai nee:
- AMP kontinua tau fiar nafatin ba Responsável sira AMP nian, liu-liu ba:
- Kompañeiru Maun Boot Kay Rala Xanana Gusmão nu’udar Prezidente AMP ne’ebé lidera AMP sai aliansa ne’ebé forte hodi serbi povu rai-doben ida ne’e;
- Belun Taur Matan Ruak nu’udar Portavóz AMP nomós nu’udar Primeiru Ministru VIII Governu Konstitusionál ne’ebé reprezenta nafatin AMP ba hatutan no konkretiza promesa sira AMP nian hodi serbi ho di’ak povu Timor-Leste;
- Kompatriota Jose dos Santos Naimori Bucar hanesan Líder AMP nian ida ne’ebé durante ne’e tau-matan nafatin ba AMP nia lala’ok;
- Konsellu Diretivu AMP atu kordena no fasilita nafatin komunikasaun entre Parlamentu Nasionál no Governu atu serbi di’ak liu tán povu Timor-Leste.
- AMP hato’o parabéns no agradese ba Maun Boot Kay Rala Xanana Gusmão ne’ebé ho nia esforsu tomak konsege realiza mehi povu Timor-Leste nian kona ba lori kadoras mai Timor-Leste. AMP fiar katak esforsu sira ne’ebé Maun Boot Kay Rala Xanana Gusmão halo hodi alkansa soberania total nasaun nian nomós sustentabilidade ekonómika Rai Doben Timor-Leste. Nune’e AMP kontinua:
- Fó apoiu nafatin ba Maun Boot Kay Rala Xanana Gusmão iha prosesu dezenvolvimentu dada kadoras mai Timor-Leste inklui dezenvolvimentu Kosta Sul (Tasi Mane); no
- Fó fiar nafatin ba Maun Boot Kay Rala Xanana Gusmão nu’udar negosiadór prinsipál ba negosiasaun fronteira terrestre no marítima ho nasaun Indonézia.
- AMP hare katak Governu nebe la kompletu prejudika implementasaun programa governu no ezekusaun Orsamentu. Nunee AMP reitera nia apoiu tomak ba Membrus Governu VIII nebe Indijitadus atu hetan posse hodi halo kompleta Membrus Governu Konstitutisionál VIII atu serbi Estadu no nasaun ida ne’e tuir povu nia desizaun. Tanba nee maka:
- Husu ba Sua Exelénsia Primeiru Ministru, Señór Taur Matan Ruak atu:
- Halo nafatin komunikasaun ho Prezidente Repúblika hodi asegura tomada de posse ba Membru Governu indijitadu sira;
- Husu ba Prezidente Repúblika justifika formalmente (por escrrito) nia pozisaun konaba membrus politikus indigitados nebe hetan mandatu hosi aliansa vencedor iha eleisaun geral anatecipada 2018, nebe prejudika mos integridade pessoal sira nian nudar sidadaun RDTL, tuir Konstituisaun Republilka Demokratika Timor-Leste.
- Bainhira la iha solusaun ba membru Governu indijitadu sira, AMP sei la halo diálogu ho kualkuer entidade no personalidade polítika.
- AMP endossa linhas de orientacao ba elaborasaun proposta Orsamentu tinan 2020-2023 ne’ebé mak aprezenta hosi Portavóz AMP nudar mos Primeiru Ministru Governu Konstitusionál Daualuk (VIII), ho observánsia ba asegura kontinuidade no melhoramentu Planu no Programas Dezenvolvimentu Timor-Leste nian hahú husi tinan 2007 to’o 2017 ne’ebé aliñadu ho Programa tinan-Lima Governu Konstitusionál VIII nomós Planu Estratéjiku Dezenvolvimentu 2011 - 2030. Tanba nee maka AMP reitera nia komitmentu, halo Aliansa ho Povu atu lori povu ba moris diak.
- AMP rekomenda ba:
- GOVERNU KONSTITUSIONÁL VIII ATU:
- Halo pagamentu ba dívidas governu nian iha areas infraestrutura, inklui projetu 143 ne’ebé implementa ona, nomós dívidas seluk-seluk tan tuir regras nebe iha atu nune’e la bele impede dezenvolvimentu nasionál no kresimentu sétor privadu nasionál;
- Apoiu hosi parseiru dezenvolvimentu tenke aliña ho Programa Governu Konstitusionál VIII no konforma ba politika ajuda externa Timor-Leste nian ho respeito ba prinsipius Country Owned, Country Lead and Use Country System;
- Programa desentralizasaun kona ba aprovasaun projetos iha nivel sub-nasional, presiza halo ho maneira fazeada.
- Kontinua hadia kondisaun no prestasaun servisu iha setor hotu-hotu liu-liu setor Saude, Educacao, Justisa no Administrasaun Publika.
- Kontinua hadia atendimentu ba Veteranos sira nebe dedika exclusivamente ba luta Ukun Aan durante tempo da luta no nomos familias martires da patria.
- Hadia diak liu tan profesionalismu forcas defesa no seguransa no kria kondisaun adekuadu ba sira atu dezempenha sira nia papel ho diak.
- Kontinua dinamiza prosesu dezenvolvimentu ekonomiku liu-liu iha Agricultura, Turismo, Comercio, Industria ho setor produtivu seluk atu garante kresimentu ekonomiku pais nian hodi hamosu kampu servisu (trabalho) atu absorve forsa de trabalho nebe oras nee sai preokupasaun boot ba pais ida nee.
PARLAMENTU NASIONÁL:
Servisu hamutuk ho Governu hodi kontinua halo reforma ba setór Justisa hodi hakbi’it Atores Justisa sira hodi hala’o sira-nia kna’ar di’ak liu tan atu garante justisa ida ne’ebé transparente, justa, no ekilibrada.
- AMP reitera nia pozisaun hodi kumpre kompromissu eleitoral 2018, kona-ba la-rekondúz Mandatu Prezidente RAEOA ba mandatu foun. Husu ba Sua Exelénsia Primeiru Ministru, Señór Taur Matan Ruak atu informa desizaun ne’e ba Prezidente Repúblika.
