Mari Alkatiri asume kargu nu’udar Primeiru Ministru ba VII Governu Konstitusionál ninia, tanba ne’e bainhira nia atu sai fali sente kmaan liután.

“Agora ha’u sai husi iha ne’e kmaan liután. Signifika katak, governu foun atu mai ona iha tempu badak nia laran”, dehan nia, iha Palásiu Prezidensiál Bairru-Pité, horisehik.

Nia esplika, hafoin husik kargu Xefe Governu, Alkatiri sente iha ona tempu barak atu bele halo vizita ba munisipiu hotu-hotu.

Iha biban ne’e, Alkatiri mós kongratula partidu AMP tanba eskolla ema di'ak ida hodi bele troka nia fatin hodi halo servisu ba nasaun.

kona-ba bankada FRETILIN abandona plenária iha eleisaun estrutura meza PN, nia dehan, sei la akontese tan, maibé FRETILIN hakarak sai opozisaun ne’ebé forte iha PN, la’ós atu hatún governu.

Sei halo opozisaun ne’ebé forte tebes atu governu bele iha sentidu responsabilidade.

Nia dehan, bainhira ema ruma maka asume kargu Xefe Governu ka Prezidente Konsellu Ministru, partidu polítiku sira tenke halo opozisaun uluk ba nia, la'ós opozisaun atu hatún opozisaun, maibé prontu ezije atu servisu di’ak liu.

FRETILIN ne’e iha sentidu responsabilidade durante tinan hira ne’e, halo primeiru opozisaun ne’ebé forte tebes la rekoñese governu durante tinan lima IV Governu.

“Sira tuir mai V no VI governu muda pozisaun uitoan atu ajuda trava despeza, labele halo despeza oioin, ne’e mós ninia rezultadu maka ita haree daudauk. Agora tenke fila-fali opozisaun ida ne’ebé forte, maibé la'ós atu hatún governu”, tenik nia.

Mari Alkatiri mós hateten, dala barak ona laiha ona ai-tonka no laiha ona ai-kabidu ninia kabas ne’e sira maka tenke tau ain para haree dook liu.