CPN-CNRT halo akuzasaun ne’e liu husi konferensia ba imprensa no sirkula ba media privada balun hodi publisidade.

“Ha’u mai hatama keisa iha Prokuradór Jeral Repúblika ne’e ha’u hanesan sidadaun, laos mai hanesan lider nasionál, Sekretariu Jerál Partidu nian, maibé hanesan sidadaun atu reklama ha’u nia direitu ba estadu, direitu bom nome, direitu diginidade, direitu atu nafatin la bele nafatin ataka ha’u kuandu laiha baze,”dehan eis PM ne’e ba jornalista sira hafoin hatama keixa ba iha Prokuradór Jerál Repúblika.

Alkatiri dehan, sei la tolera ema ida, tanba tempu too ona atu buka lialoos liu husi prosesu legal.

“Tolera tinan 50 ona ne’e laos ituan agora buat ne’e atu bo’ot ba bebeik, entaun ha’u hanoin tempu to’o atu hatudu ba maluk sira ne’e katak labele abuzu ho nia toleransia tanba lei sei iha,”dehan nia.

Estadu no orgaun judisiariu tenki konsidera reklamasaun sira ne’ebé ho fundamentu no akuzasaun sira ne’ebé laiha fundamentu tenki responsabiliza iha justisa nia oin.

Tanba atu buka lialoos no justisa nia fatin ne’e iha Triunál, laos akuza malu iha media oioin.

Tanba ne’e, nia rasik mai halo reklamasaun ba akuzasaun sira ne’e liu husi faze dahuluk mak keixa hasoru CPN-CNRT nian, faze daruak mak sei keisa kontra Bankada CNRT, faze datoluk mak keisa kontra sidadaun na’in haat ne’ebé nia labele temi naran iha públiku, no faze ikus mak hatao’o keisa kontra media balun, ne’ebé fó sai akuzasaun CPN-CNRT ne’e liu husi pajina publisidade.

“Ha’u hatama keisa ne’e kontra Comisaun Politika Nasionál-CNRT komesa iha leten to’o mai karik, tanba sira mak dezafia fali ha’u, sira akuza sira mak tenke lori keisa ne’e mai iha ne’e laos ha’u, sira ne’e ibun mak bo’ot deit sira komesa nakdera ona,”tenik nia