Mediku sira lamenta tanba subsidiu ba Jestor Administrasaun no Profissional Saúde ne’ebé la hanesan.

Mediku sira lamenta tanba oras esensial ba profissional saúde iha HNGV ba loron 38 de’it no oras naun-esensial ba Jestor Administrasaun HNGV no Ministériu Saúde masimu loron 65 no mínimu loron 44.

Ba kestaun ne’e, Ministra Saúde Odete Maria Freitas Belo hatete, médiku sira iha direitu atu halo protesta ba asuntu ne’ebé mak sira la satisfas, maibé tenke ho karta formal atu nune’e bele iha solusaun.

“Dalan ne’ebé sira halo hodi protesta ne’e mós normal, maibé ba Ministériu Saúde importante iha karta formal ida, tanba lista pagamentu ne’e mai husi sira-nia diretór sira,” dehan Odete iha Palasiu Governu, Kuarta (08/07).

Nia esplika, ministériu simu lista husi diretór sira iha HNGV, no ministériu halo pagamentu tuir lista refere.

Odete informa, tuir rezolusaun númeru 13/2020 ne’ebé Konsellu Ministru aprova, ba Ministériu Saúde nian depende ba lista prezensa katak mediku sira simu subsidiu bazeia ba loron ne’ebé sira tama serbisu.

“(Mediku) sira iha direitu simu de’it loron ne’ebé mak sira halo serbisu, laos pakote hanesan F-FDTL no PNTL nian,” dehan Odete.

Tan ne’e, nia husu ba mediku sira ne’ebé naran laiha, loron menus, ka iha falansu bele halo karta justifikasaun ne’ebé hetan asinatura husi nia diretór hodi aprezenta ba MS.

Nia dehan, nu’udar trabaladór profissional Funsaun Públika (FP) komunikasaun sira ne’e tenke formal ka tenke liu husi karta.

“Halo protesta liu husi media ne’e bele maibé asaun ida halo karta formal ne’e tenke to’o iha superior hodi bele foti desizaun. Superior sira tenke hatan liu husi karta formal labele hatan husi media,” dehan nia.

Kona-ba ameasa husi mediku sira atu greve bainhira MS la hatan iha loron tolu nia laran, Odete dehan, iha konstituisaun RDTL artigu 51 no lei funsaun públiku númeru 42, fó liberdade ba ema espresa sira-nia hanoin ne’ebé la satisfeitu no bele halo protesta, maibé labele impede serbisu ospital nian.