Tuir Alkatiri, governu foun ne'ebé sei forma husi CNRT ho nia aliadu ninia dalan sei badak tanba intensaun husi Prezidente CNR Kay Rala Xanana Gusmão la'os atu hein eleisaun jeral 2023, maibé atu provoka krize hodi halo eleisaun antesipada.
“Nono governu mak mai husi koligasaun foun dalan sei badak, sei rahun fali, tanba intensaun Xanana nian laos atu hein ba iha eleisaun 2023, atu provoka krize atu halo eleisaun antesipada, See mak lao hamutuk ho Xanana agora boa sorte,” dehan Alkatiri iha Konferensia Nasionál FRETILIN ba dala haat iha Salaun Parokia São José, Katedral, Vila Versa, Sabadu (14/03).
Tuir Alkatiri, krize politika iha TL nia abut mak koko ukun no laiha vizaun klaru no misaun konsistente.
“Situasaun krize polítika iha ita-nia rai doben Timor Leste nia abut refere ba ukun koko ba koko mai, lamas ba lamas mai, ukun mamuk ho politika, ho vizaun klaru no misaun konsistente,” deklara nia.
Nia dehan, ukun hanesan ne’e hahú kedas iha 2007 ho Governu de faktu ida ne’ebé iha moris ho ansi no kontra kedas artigu 106 Konstituisaun RDTL.
"Prezidente (Repúblika) mak sai fali parteiru ka bidan dudu bebé sai husi inan nia kabun molok atu kompleta nia tempu. Tanba Prezidente entrega governu diretu ba segundu Partidu mais votadu. Iha lian português ita bolu partu prematuro".
Nia dehan, krize ne'ebé hanaran impase politika ne'e foin hahú iha 2017 bainhira FRETILIN sai partidu dahuluk iha eleisaun ba Parlamentu. Maibé iha TL krize politika hahú kedas bainhira Xanana Gusmão hada'u ukun iha 2007 ho nia AMP I no nia governu de faktu.
"Xanana Gusmão hatene katak osan husi Bayu Undan hahú tama ona iha fundu minarai iha 2005. Iha 2006 krize, golpe kontra I Governu Konstitusional," dehan Alkatiri.
