Tuir informasaun ne’ebé diariu ne’e asesu husi membru AMP, partidu koligasaun ne’e nomeia ona Taur Matan Ruak ba kargu Primeiru Ministru. Nune’e, Xanana Gusmão ba Ministru Konselleiru ba Primeiru Ministru nian.

Ne’e duni, naran ne’ebé aprezenta ba Prezidente Republika, iha reinuan, Tersa (19/6), AMP aprezenta ona naran ,Taur Matan Ruak nian. Nune’e, sei iha tempu ba PM indijitadu hasoru Xefe Estadu hodi aprezenta ninia membru governu sira.

“Ohin prezidente bolu atu konsulta AMP. Ita hatene katak governu mai husi Parlamentu, tanba ne’e maka AMP indijita. Agora Prezidente ohin loron haree hela oinsá buat sira ne’e bele la’o”, dehan Prezidente AMP, Kay Rala Xanana Gusmão, iha Palásiu Prezidensiál Bairru-Pité, horisehik.

Nia hatutan, iha oportunidade AMP hasoru malu ho Prezidente Repúblika lalais liu signifika Primeiru Ministru sei simu pose tuir kalendáriu ne’ebé iha ona, maibé kestaun hirak ne’e Xefe Estadu maka sei fó sai Primeiru Ministru VIII governu konstitusionál ba públiku.

Xanana mós agradese ba PR Lú-Olo nia dispozisaun no preokupasaun ba prosesu polítika ne’ebé la’o iha rai laran.

Estrutura Governu XG-TMR Mak Bele Fó Sai

AMP prepara ona estrutura membru VIII governu hein lideransa másimu hanesan Kay Rala Xanana Gusmão no Matan Ruak mak bele ofisializa fó sai iha média nasionál akreditadu sira.

Prezidente Komisaun Diretiva Nasionál AMP, Fidelis Magalhães hatete, estrutura membru VIII governu konstitusionál ohin loron husi AMP prepara hotu ona, maibé atu publika sai ba públiku ne’e kompeténsia lideransa másimu AMP nian.

“Ha’u laiha kompeténsia atu publika sai naran estrutura membru governu sira nian”, dehan nia, iha Parlamentu Nasionál, horisehik.

Iha fatin hanesan, Presidente Jurisdisaun AMP, Arão Noe hatete, iha Kinta lokraik foin lalais ne’e, AMP indijita ona primeiru ministru no naran ne’e entrega ba Presidente Repúblika.

Tanba ne’e, Xefe Estadu maka iha kompeténsia atu bele bolu PM indijitadu atu bele forma ona VIII governu konstitusionál.