Nune’e Prezidente Parlamentu Nasionál, Arão Noe de Jesus kompromete sei rezolve problema transporte ne’e atu fó ba kada deputadu sira atu utiliza hodi funsiona servisu parlamentu nasionál nian.
“Parlamentu Nasionál V lejizlatura estabelese ona, maibé ami sei iha problema maka transporte, maibé ha'u garantia katak sei rezolve iha tempu badak nia laran”, dehan nia, iha Uma Fukun PN, horisehik.
Ba karreta Prado ne’ebé eis-deputadu III lejizlatura sira uza, maibé to’o agora seidauk entrega ne’e seidauk bele ko’alia atu foti-fali ka lae, ne’e sei deside iha Konsellu Administrasaun Parlamentár.
Tuir Arão, deputadu eleitu sira iha V lejizlatura iha nia papál maka atu produs lejizlasaun no halo fiskalizasaun, atu funsiona knaar ne’e presiza transporte atu fasilita sira ba mai servisu, maibé oras ne’e daudaun sei problema hela tanba ne’e sei diskute ho lider bankada sira oinsá atu solusiona.
Iha III lejizlatura PN revé ona orsamentu atu halo akizasaun karreta foun ba deputadu sira, maibé to’o agora seidauk bele ezekuta. Tanba ne’e, ba oin atu sosa fali karreta foun ka kontinua atribui karreta tuan ba deputadu sira ne’e sei koordena ho sekretáriu jerál PN.
Antes ne’e, Diretór Ezekutivu Asosiasaun HAK, Manuel Monteiro hatete, Parlamentu Nasionál liu husi Konsellu Administrasaun foin lalais ne’e halo ona karta ida hodi hapara ona prosesu alienasaun ba karreta Prado nian.
Prosesu alienasaun hapara ona, maibé eis-deputadu balun lori karreta ne’e ba uma to’o agora seidauk hatama. Nune’e, konsidera halo aktu krime korrupsaun no abuzu podér. Tanba ne’e, Konsellu Administrasaun presiza halo karta ruma ba ministériu públiku atu buka tuir dalan legál.
