“Ha’u espera iha eleisaun parlamentár ne’e remata partidu rua hanesan CNRT no PLP ladún di'ak iha tinan balun nia laran, maibé ha’u fiar sira sei ko'alia eleisaun parlamentu nasionál ne’e remata”, dehan nia, hafoin partisipa votasaun iha Eskola Ensinu Báziku Filiál Metiaut, Sábadu (22/7).

Entretantu, Horta mós apela ba partidu ne'ebé votu maioria iha eleisaun parlamentár 2017 tenke hatudu sentidu Estadu hodi bele hakuak partidu ne'ebé la manan iha eleisaun parlamentár.

“Ha’u husu ba sira (partidu) ne'ebé manan iha primeiru lugar tenke hatudu nu’udar ema matenek sentidu Estadu para hakuak sira ne'ebé la manan primeiru lugar,” tenik nia.

Tuir Horta katak, loron 22 Jullu hili liu husi parlamentu atu ba Primeiru Ministru foun tinan lima (5) mai. Durante ne'e dezde tinan iha 2012 bainhira povu ezerse nian direitu hodi hili prezidente podér ezekutivu no lejizlativa la'o di'ak tebes, tanba hatudu ona iha instituisaun demokrátiku Estadu nian funsiona di’ak.

“Agora komesa marka tan istória dala ida tan hili órgaun lejizlativa hodi sai governu foun bele haree povu no nasaun durante tinan lima”, tenik nia.

Tanba iha prosesu eleitorál, kampaña, debate di'ak tebes laiha violénsia tanba ne’e konsidera bele iha ona transparénsia no integridade.

Eis-Xefe Estadu hateten, Presidente Repúblika sei bolu partidu ne'ebé mais votadu iha eleisaun parlamentár hodi halo diálogu rona sira nian opiniaun, hodi rona mós deputadu sira hodi haree sé mak sai Primeiru Ministru atu forma governu.

Ho nune’e, nia apela ba iha lider partidu polítika CNRT, FRETILIN, PLP no PD bele eduka nian militante sira, hodi bele asegura no garante estabilidade iha festa demokrasia ne'e. Maibé, mós kongratulasun tebes ba povu tomak bele asegura ona prosesu demokrátiku ne'ebé la'o iha Timor-Leste di'ak tebes.