Membru MOE-EU Izaskun Bilbao Barandica hatete, kampaña no eleisaun Parlamentár iha Timor-Leste hatudu ezemplu di’ak ba mundu tanba la’o ho pás no estabilidade nia laran.

Nia dehan,organizasaun Jestaun eleitorál Timor nian hatudu sira nia kapasidade atu organiza eleisaun ida ne’ebé administra ho di’ak kredivel no inkluzivu.

“Eleitór sira bele ezerse sira nia direitu iha ambiente ne’ebé hakmatek no laiha interferénsia ruma”, dehan nia liu husi aprezenta relatóriu ba atividade kampaña no eleisaun Parlamentár iha Otél Timor-Dili,horisehik.

Nia dehan, Iha Partidu 21 mak kompete ona iha sírkulu nasionál ho mandatu tinan lima nian ne’ebé la’o iha ambiente pás no estabilidade inklui livre no silénsiu durante loron 30.

Nia dehan, Partidu Polítiku barak liu mak halo kampaña tama uma sai uma no balun mós ativu iha média sosiál  no debate iha televizaun.

“Ami nia observasaun ba kampaña la’o ho hakmatek no jeralmente partidu hotu hakmatek no respeitu ba liberdade espresaun báziku tanba partidu hotu asina juramentu atu hala’o eleisaun ne’ebé hakmatek no tuir regra”, dehan nia.

Tuir númeru eleitór foun hamutuk na'in 25,017 mak rejista ona durante períodu atualizasaun no dokumenta mós eleitór na’in 87,264 ne'ebé husu atu halo mudansa barak relasiona ho hela fatin.

Sidadaun TL ne’ebé hela iha rai li'ur hetan mós hetan oportunidade atu vota, maski lojistikamente hasoru dezafiu , maibé konsege realiza votasaun iha Koreia Súl no Reinu Unidu, Austrália no Portugál ne’ebé eleitór hamutuk 2.125.

 STAE mós akredita ona fiskais partidu nian hamutuk 15,525,  observadór nasionál na’in 3,285 husi organizasaun 24 no observadór internasionál na’in 198 no misaun diplomata 17 ne’ebé hetan mós oportunidade atu tuir prosesu votasaun no kontajen iha estasaun votasaun no tabulasaun iha sentru munisípiu.

Iha fatin hanesan, Prezidente ba Delegasaun Parlamentu Europeia Ana Gomes dehan, delegasaun parlamentu Europeia kontente tebes tanba povu iha partisipasaun makas iha prosesu kampaña no eleisaun parlamentár.

Nia dehan, TL iha progresu signifikativu tebes tanba bele ona jere jestaun prosesu eleitorál ne’ebé satisfatóriu tebes.

“Ha’u mós gaba seriedade no esforsu tomak husi CNE no STAE iha sira nia konsiderasaun no Implementasaun rekomendasaun ne’ebé hala'o ona hodi hadi'a prosesu eleitorál ho susesu”, dehan nia