Vise Ministru Saúde Ba dezenvolvimentu Estratéjiku Saúde (DES), Bonifácio Maukoli dos Reis hateten, kazu virus Corona ne’e akontese iha Xina afetadu ba ema kuaze rihun lima-resin (+5.000), na'in 906 konfirmandu grave no 103 mate, iha Xina.

Virus ne’e mós alastra mai iha nasaun Sudeste Aziátiku kuaze nasaun lubuk ida eseptu nasaun Timor-Leste no Indonézia maka seidauk, tanba ne’e tenke mós tenke halo prevensaun ona.

“Ministériu Saúde koordena ho WHO sosa ona ekipamentu tanba ne’e loron rua ka tolu tan sasán sira ne’e to’o ona “ dehan nia, iha HNGV, horisehik.

Nia dehan, tenke prepara ona fatin tanba karik deteta kazu tenke izola. Kona-ba ekipamentu sira ne’e koopera ona ho WHO atu sosa thermal Scanner neen (6) no mós Personal Protection Equipment (PPE) atu halo atendimentu ba pasiente sira karik afeita ba Virus Corona.

Pesoál saúde sira mós halo treinamentu simulasaun oinsá atu simu pasiente Virus Corona atu transporta no mós halo atendimentu ba pasiente sira. Fatin izolamentu sira ne’e sei prepara tan iha sentru saúde Formoza.

Koordena ona ho WHO atu sosa tan thermal scanner, maibé ne’e la’ós atu deteta, maibé atu hatene de'it nia sintoma. Tanba ne’e, karik deteta sintoma mosu sei haruka amostra ba Austrália atu halo teste iha laboratóriu maka foin haruka nia rezultadu mai atu bele hatene katak nia afetadu ba virus ne’e ka moras seluk.